Nigerian Senator bag seven years prison sentence for fraud - EFCC
Senator Peter Nwaoboshi on Friday get seven years prison sentence for fraud.
Court of Appeal na im jail di serving Nigerian senator, according to di Economic and Financial Crimes Commission [EFCC].
Senator Nwaoboshi dey represent Delta North Senatorial District for di National Assembly.
Di Lagos Division of di Court of Appeal find di lawmaker guilty for charges of fraud and money laundering.
EFCC, Nigeria anti-corruption police, na im bin prosecute di matter on behalf of goment.
Di court also order say make im two companies, Golden Touch Construction Project Ltd and Suiming Electrical Ltd dey closed.
Di order na in line wit di provisions of Section 22 of the Money Laundering Prohibition Act 2021, EFCC tok.
Di Appellate Court ruling dey come afta di judgment of one Federal High Court, Justice Chukwujekwu Aneke on June 18, 2021 discharge di lawmaker and odas.
Dat time, di lower court clear di defendants of two count charge of fraud and money laundering.
Why EFCC drag Senator Nwaoboshi
EFCC bin arraign di defendant plus two odas on top accuse say e buy one property wey di name na Guinea House for Marine Road, Apapa Lagos for N805 million.
According to di Nigeria anti-corruption police, im company, Suiming Electrical Ltd on behalf of Nwaoboshi transfer di sum of N322 million give di vendor.
Di sum na as part payment and EFCC claim say Golden Touch Construction Project Ltd dey part of di company wey benefit from di proceeds of di fraud.
But for im judgment, Justice Aneke of Lagos Federal High Court rule say di prosecution fail to call vital witnesses and tender concrete evidence to prove di elements of di offences on why e charge di defendants.
However, di court of Appeal wey rule on di EFCC appeal tok say di trial judge no do well to dismiss di charges against di respondents.
E say di prosecution bin prove di ingredients of di offence and find di defendants guilty as charged.
Who be Senator Peter Nwaoboshi?
Senator Peter Onyeluka Nwaoboshi na Nigerian politician and member of di kontri ruling All Progressives Congress.
Dem born am for 1958 for Delta State, Nigeria.
Nwaoboshi graduate from di University of Benin where e get Bachelor of Law and Master of Laws from Delta State University.
E be senator of di 8th and 9th National Assembly. Im be dey di main opposition Peoples Democratic Party until June 2021 wen e decamp.
One Federal High Court for Abuja bin sack am shortly afta dem announce am as senator-elect during di 2019 general elections on top accuse say im political party no elect am.
But di Appeal Court for Abuja however overturn di decision on 30 May 2019.
Di lead judge rule say di Federal High Court wey nullify im election no get jurisdiction over di case.
Nwaoboschi start im career for 1979 as aide to Samuel Ogbemudia, govnor of di then Bendel state.
E later dey appointed as di Chairman of Nigerian Railway Corporation.
In 1999, e become political adviser to govnor James Ibori.
For 2000, e dey appointed as Commissioner for Agriculture and Special Duties for Delta State where e serve for dat position till 2006.
For 2008, e chop appointment as di State Chairman of di Peoples Democratic Party for Delta state. E do second term as state chairman for 2012 and for 2014 before e resign to run for senate.
In 2015, dem elect am as di Senator representing Delta North senatorial district for di National Assembly.
For April 2018, di Economic and Financial Crimes Commission arraign Nwaoboschi on charges of fraud and money laundering.
For 2019 e become di Chairman of Senate Niger Delta Committee.