Regina Daniels and Ned Nwoko welcome second pikin

Regina Daniels and Ned Nwoko

Wia dis foto come from, Instagram/@ReginaDaniels

Popular Nigerian actress Regina Daniels don deliver her second pikin for Jordan.

Senator Ned Nwoko wey be husband of di feem producer and model na im post for social media to announce say im wife Regina born baby number two same day wey dem dey celebrate dia first son birthday.

For di post, Oga Ned say, “ e be double celebration today for di family as Moon turn two years…. E be also delight to announce di arrival of our second son today.”

“Regina and di baby dey do very well for Amman Jordan. Uniquely Moon and im baby broda now dey share di same birth date. Di family dey over di moon, Oga Ned tok.

Two years ago, Regina Daniels born her first pikin. Dem name am Munir Neji Ned-Nwoko.

Dat time, di first time mama bin siddon wit BBC Pidgin to tok about her motherhood experience.

Who be Regina Daniels?

Wia dis foto come from, Regina Daniels

Regina Daniels don always dey for public eye as she begin feature for Nollywood feems since wen she dey small.

However, she come trend more wit her marriage to Nigerian billionaire wey senior her well-well and also don get oda wives.

For 2019, 59 years old Ned Nwoko marry Regina wey be 19 as at dat time.

E generate mixed reactions that time sake of di age difference as many pipo question di actress motivations.

Regina and Nwoko welcome dia first child together June 2020.

Who be Ned Nwoko?

Wia dis foto come from, Ned Nwoko/Instagram

Ned Nwoko na former Nigerian lawmaker, lawyer and philanthropist.

E dey married to popular Nollywood actor Regina Daniels.

Regina and Nwoko welcome dia first child together June 2020.

For June 21 2022, Ned Nwoko bin follow BBC tok about wetin im tink about di presidential candidate of Labour Party, Peter Obi.

Ned Nwoko for di interview tok why e say Peter Obi no get wetin dey required to lead Nigeria for now.

Di lawyer, politician and businessman interview wit BBC Igbo make pipo tok as momentum for next year election don dey gada heat.

"E be capitalist, one big-time player for di business world, and dey conservative for how e dey handle tins".

 “I go like am back for PDP, e go do well as Minister of Economy, and e go helep us turn around Nigeria economy".

 Ned Nwoko just win PDP Senate ticket to contest 2023 general elections for Delta North senatorial district inside Delta State, southern Nigeria.