Got a TV Licence?

You need one to watch live TV on any channel or device, and BBC programmes on iPlayer. It’s the law.

Find out more
I don’t have a TV Licence.

Summary

  1. INEC chairman Prof. Yakubu Mahmood say no political party dey allowed to campaigns until 23rd February election
  2. INEC don postpone presidential and national assembly elections by one week.
  3. Tow main parties, PDP and APC don condemn INEC move and dey accuse each oda say dia hand dey inside.
  4. Nigeria police don restrict movement from 6am to 6pm on Saturday 16 February, sake of di general election
  5. Nigeria go close border from Friday 15 till Monday Sunday 17 February sake of election
  6. Nigeria election office INEC dey distribute election materials.

Live Reporting

By Daniel Semeniworima and Nduka Orjinmo

All dem times wey dem write be UK

  1. Na here we go march break!

    Remember say INEC chairman Prof. Yakubu Mahmood say no political party dey allowed to do campaigns until 23rd February election.

    Until we show again for di postpone election.

    Una bye-bye!

    Okon Lagos
    Image caption: Make we leave una wit dis foto. Okon Lagos na INEC Observer wey suppose monitor today election but now im dey monitor anoda tin for area. . "... you know say na so we dey do our tin..."
  2. Meet INEC Observer wey dey monitor election postponement

    Nigerian Nollywood actor, Ime Bishop Umoh aka Okon Lagos na one of di INEC Observers wey suppose monitor Saturday election wey di kontri election office don postpone to 23rd February, 2019.

    Okon Lagos wey dey represent National Institute for Legislative and Democratic Studies say as tins be so im dey monitor di election postponement.

    View more on facebook
  3. Thugs burn down six buses for Akwa Ibom

    Jaguda pipo don burn down six buses wey carry INEC materials for Obot Akara Local Government Area for Akwa Ibom state, South-South Nigeria

    Tori be say two pipo die for di incident.

    Edet Akpan wey witness di incident tell BBC News Pidgin say na for early mor mor Saturday di tin happun.

    Im say corpers bin follow dey inside di motor wen di tin happun but im no know weda dem follow for di two pipo wey die.

    Wen BBC pidgin speak with Akwa Ibom state police tok tok pesin, Odiko Macdon im say both him and di Commissioner of Police dey on dia way to di scene and dem go only tok wen dem see wetin don happun.

    View more on twitter
  4. No more campaigns until 23rd February vote

    INEC chairman Prof. Yakubu Mahmood say no political party dey allowed to do campaigns until 23rd February election.

    Di head of Nigeria election office give key stakeholders dis warning on Saturday as im dey ansa kwesions ontop reasons whyINEC postpone election.

    E add say e no more collection of Permanent Voters Cards -PVCs until afta di elections.

    Di election wey dem shift from Saturday 16 February, go now hold on Saturday 23rd February 2019.

    INEC key stakeholders
  5. 'Election postponement no get anytin to do wit Security & Influence'

    Fire, bad weather, delay for transport of ballot papers, result sheets na im make election postpone - INEC Chairmo

    Head of Nigeria election office, Yakubu Mahmood and members of di Independent National Electoral Commission tell key stakeholders say na fire, bad weather, delay for transport of ballot papers and result sheets make dem postpone di 2019 general elections.

    "E no get anytin to do wit security or influence"

    Prof. Mahmood say im dey very very sorry for shifting di date of di election from 16 Feb. to 23 Feb. 2018 and say im take 'responsibility' for di postponement.

    E say dem face sabotage wen INEC office dem catch fire for Abia, Anambara and Plateau state but dem try overcome am.

    Again, dem face delay for transport of election materials from Central Bank of Nigeria and in some case bad weather delay flight.wey cari election material just 24 hour before di election.

    Head of Nigeria election office, Yakubu Mahmood
  6. Buhari don return to Abuja afta election postpone

    President Muhammadu Buhari don waka comot from im village for Daura, Katsina state.

    Buhari wey be di APC candidate reach Abuja dis afternoon afta INEC Postpone today Presidential and National Assembly elections.

    false

    President Buhari
    Image caption: President Buhari dey tell pipo bye-bye before e enta plane
    President Buhari
    President Buhari dey tok wit Katsina state Govnor Aminu Bello Masari
    Image caption: President Buhari dey tok wit Katsina state Govnor Aminu Bello Masari
  7. Five 'logistics' reasons wey fit don make INEC postpone elections

    Mahmood Yakubu
    Image caption: INEC chairmo Prof. Mahmood Yakubu dey do meeting dis afternoon wit stakeholders

    Nigerians still dey para afta di midnight postponement of di 2019 General Election.

    As political parties dey blame each oda and Nigerians dey shame for di process, INEC don put simply say na logistics make di election date bend.

    But wetin fit be dis logistics? Dis na some ideas:

    • Di INEC offices wey don dey burn around di kontri. Just dis week, fire burn INEC offices for Anambra State and last week na for Qu’an Pan local goment for Plateau state and Isiala Ngwa local goment for Abia state. Although INEC ogas for those areas tok say dem don replace things like card readers wey burn, e fit be say no be all dem replace.
    • Security na anoda logistical mata wey fit no allow election to hold. For 2015, security na di reason why dem bin postpone di election. On Friday, Kaduna State Govnor Nasir el-Rufai announce say 66 pipo die for di Kajuru local goment area of di northwest state.
    • Moving sensitive materials fit cause beta logistics wahala. For late last night, BBC tori pipo for Delta and Edo states confam say INEC bin get issues to move materials from CBN offices for both states. For Edo state, officials tok say Presidential election collation sheet neva even land for di state.
    • APC wahala for Zamfara and Rivers States. APC members bin protest for di INEC office for Port Harcourt Rivers State, say make di election bodi put dia party for ballot paper afta court bin don say no. Also, for Zamfara State, gi govnor bin don tell INEC say election no go hold for di state if dem no put APC for ballot paper. Infact sef, Nigeria Attorney General bin advise di election bodi to postpone election inside di state afta e look like say Court of Appeal tok new thing ontop di mata.
    • INEC issues with dem adhoc staff. BBC hear from different adhoc staff of INEC on Saturday, and e dey clear say arrangements bin no tight to take care of dem. Most corpers bin no fit see place sleep, and for Port Harcourt, transporters wey move things for INEC protest block road, say dem neva pay dem.
  8. You fit postpone election but you no fit postpone destiny - Atiku

    Presidential candidate of di People's Democratic Party, Atiku Abubakar don describe di postponement of di 2019 general elections as "hand of Esau, voice of Jacob."

    Di PDP candidate wey say na Buhari postpone di election, say na to provoke Nigerians to do something bad wey di goment go use do more-more "anti-democratic" things.

    "I call on all Nigerians to dey patient. We don tolerate di bad things wey dis goment do for four years. We go fit extend our tolerance few more days and use vote tell dem our mind," im tok for im twitter page.

    Im add say dem fit postpone election but dem no fit postpone destiny.

    Atiku
  9. Sowore: Pipo travel from all over di world come vote for me

    Presidential candidate of di African Action Congress (AAC) Omoyele Sowore don follow BBC Pidgin tok about di election postponement.

    Im say e no make sense say election wey dem plan for four years, dem use 6 hours postpone am.

    "Na so dem do for 2015...but di thing wey we dey tell dem be say weda dem postpone or no postpone election, na we go still win dis election," im tok.

    Im tell im supporters say make dem no worry, make dem still come out to vote next week.

    Video content

    Video caption: Sowore: Pipo travel from all over di world come vote for me
  10. INEC no try at all afta all di support wey we give dem - Buhari

    Buhari

    President Muhammadu Buhari don chook mouth ontop di postponement of Saturday election by INEC.

    Di presido wey be one of those wey dey follow contest, say INEC no try at all and e dey disappointed like many Nigerians say dem postpone afta all di support wey im goment give dem.

    Di Presido wey say e dey leave Daura, Katsina northwest Nigeria dis morning to attend stakeholders meeting with INEC by 2pm Nigerian time add say make di election bodi make sure say materials wey don already dey location dey safe for next week.

  11. Post update

    "All di time wey INEC get to prepare, wetin dem take am do?"

    Video content

    Video caption: INEC Chairman Mahmood Yakubu: "If dem say make e resign, e worth am"
  12. Post update

    Pipo still dey provoke, including dis guy wey bin neva hear say dem don postpone election.

    Video content

    Video caption: Nigeria Elections 2019: Pipo dey react as INEC postpone elections
  13. Bizness as usual

    Earlier we bin show foto wey look like Port Harcourt still dey sleep. Di pipo don wake up and wetin follow am na traffic.

    Port Harcourt image
  14. How BBC reporters take see election postponement for different states

    BBC Pidgin bin dey live for Facebook wia our reporters wey dey ground for different parts of di kontri give us tori of wetin dey happun.

    You fit watch di video here or for our Facebook page.

    By 10am Nigerian time, we go dey Live again to bring you more tori.

    View more on facebook
  15. Nigerians react to INEC decision to postpone elections

    Video content

    Video caption: INEC postpone election dey make Nigerians react
  16. How corpers and oda INEC adhoc staff sleep for classroom, bus and open field

    Pishures full ground of members of National Youth Service Corps (NYSC) wey be di pipo INEC dey use as polling officers for Nigeria elections.

    INEC don postpone di election but many of di corpers wey be adhoc staff bin don already deploy across Nigeria.

    Tori wey don dey go round social media show corpers dey sleep for field and public buss for different places.

    INEC Bayelsa
    Image caption: INEC office for Bayelsa State and na under is canopy many of dia adhoc staff sleep.
    corpers
    Image caption: Dis foto dem na from social media and di tori na say NYSC members wey suppose work for INEC sleep for classrooms
    corpers
  17. Post update

    Ghost town Pitakwa

    Port Harcourt
    Image caption: Pipo for pitakwa no dey carri dia sleep play. Area still dry like say everybodi travel.
    Port Harcourt
  18. Post update

    "I bin wan be di first to vote"

    Hajiya Sa'adatu

    Hajiya Sa’adatu bin neva hear say dem don postpone election and she come out to vote. She say bodi no sweet her as she bin wan be di first to vote for Kano State.

  19. Man must wak!

    Shops don begin open as elections no go hold again

    Shop owner
    Image caption: No time to waste time. Shops don begin open for customers as e be say no election on Saturday again.
    Shop owner
    Image caption: Small shops don begin open for Makrudi di Benue State capital to do bizness.
    shop owner
    Image caption: Pipo wey dey house go need water, and dis water seller gatz make moni. One plus one na two.
  20. Nigerians dey provoke as INEC postpone election

    Many Nigerians wey bin don prepare to vote on Saturday, dey provoke give INEC and di chairmo Prof. Mahmood Yakubu afta dem postpone election by one week.

    Na ontop social media many of dem gada to pour out dia vex.

    View more on twitter
    View more on twitter
    View more on twitter
    View more on twitter