Lassa fever: 3 suspected cases don dey Nassarawa

Man dey feed rat Image copyright NARINDER NANU/AFP/Getty Images
Image example Na di rat wey get plenty breast dey spread Lassa fever

E be like say the Lassa fever don enter Nassarawa state North-central Nigeria.

Di Medical Director of di Federal Medical Centre Keffi, Dr. Giyan Joshua-Ndom tell tori people say dem get three suspected cases wey dey quarantine for di hospital as dem dey wait di result of di test wey go confirm weda dem get Lassa fever.

Im come beg people say make dem no panic as dem dey do di necessary things so di virus no go spread.

For Ebonyi state, four people don die of Lassa fever for Ebonyi State and 139 people dey under surveillance as dem bin get contact with those wey die of di disease.

Commissioner for health, Dr. Umezurike tell tori people for Abakaliki say dem don get nine confirm cases including one mama and pickin wey dey take treatment while three people dey critical stage and one woman dey take treatment for the Irrua Specialist Centre for Edo State.

Government on Thursday order all primary and secondary schools to close for Ebonyi State, south-eastern Nigeria because of Lassa fever.

Fresh Lassa fever sickness start for di state on Sunday di 14th of January 2018, according to di National Centre for Disease Control.

Di government announce say all school go close until January 26 in order to stop di spread of di sickness.

Di state government say dem don put everybody wey dem suspect say fit get di sickness inside one special ward for hospital.

Meanwhile, di team of experts wey dem call to come from Lagos don land.

Di Nigerian government don also send rapid response team to Abakaliki; even experts from di specialist centre for Irrua, Edo State sef don come to help dem.

Topics Wey Dem Resemble

Another thing we de for inside dis tori