Ghana: Soldier wey die join Ebony fit get court case

Ebony Reigns Facebook photo

Wia dis foto come from, Ebony Reigns/Facebook

Wetin we call dis foto,

She and others follow for di journey wey only di driver survive

Di military authority for Ghana don talk say dem dey investigate how Lance Corporal Vondee Francis Atsu, take die for di same accident wey kill popular musician, Ebony Reigns.

Dem talk dis one even as dem deny local report say di military fit no release di deadi bodi of di soldier wey die.

Corporal Vondee follow musician Ebony die for Thursday deadly car accident along with one other person wey dem dey call Francisca Nkansah Kuri.

Ebony, wey her real name be Priscilla Opoku-Kwarteng bin dey come back from Sunyani wey she bin go see her Mama who just land from jand (UK).

Ebony bin dey waka with three oda people before di accident happen and na only di driver survive.

Di people wey bin dey manage Ebony don comot to talk say dem no know di driver or di soldier wey bin follow am for di travel.