Video don show, wia chief coach of Nigeria Super Eagles, Salisu Yusuf, dey collect money as im dey yan wit some pipo about how im go take select some players for di team.
Na for September 2017 controversial Ghana tori pesin Anas Aremeyaw Anas do di recording, wey im cari give BBC investigation pipo, Africa Eye.
- 'Pesin wey dey collect N3m everi month?' Nigerians react to video of Salisu Yusuf wey collect $1000
- Goment don suspend evritin wey concern football for Ghana
- 'Our day-our day' for Ghanaians as Anas dey premier Number 12 video
Di video show as two undercover reporters and Salisu siddon for hotel lobby. Im collect money from di reporters, wey say na $1000.
Dis Anas reporters bin dey pretend say dem be football agents and wan make two Nigerian players follow for di team wey dey go Africa Nations Championship wey dem dey call CHAN.
Di two players make di team and connection no dey say di money di coach collect affect how im take select players. Both di pipo wey dey run football for di world wey be FIFA and di pipo wey dey run am for Nigeria wey be NFF, dey against officials to collect dash money.
Coach Yusuf bin tell di reporters say selection for CHAN na based on form and how di players dey play alone. Im tell BBC say wetin im collect na $750, no be $1000, and say na chinkini money wey im feel say no dey against di rules and say im no believe say im do anytin wey dey against FIFA or NFF law.
Salisu Yusuf bin follow Super Eagles go Russia World Cup and suppose cari di U-23 team team go Olympics for 2020.