300 Christians: Imam wey save 262 pipo from Plateau killings go collect presidential handshake

Imam
Image example Di Imam say im hide di women for im house and di men inside Mosque

Imam wey tell BBC Pidgin how e save pipo from plateau killings go collect presidential handshake.

Presideo Muhammadu Buhari on Monday invite di Imam wey save pipo wey bin dey run from herdsmen attack for Barkin Ladi area of Plateau state for central Nigeria to come collect national honour and handshake.

Di 83-year-old Abdullahi Abubakar, di Imam of Nghar village of Gashish District for Barkin Ladi bin hide 262 pipo inside im house and for Mosque for June 24, 2018. Some suspected herdsmen bin show for Barkin Ladi wey make di villagers run comot.

Dem no support media player for your device
'Wetin my eye see for Plateau killings'

Those wen im rescue tell BBC say belle sweet dem as dem hear say goment wan honour am.

Dem say wetin do show good example and if no be for him, dem for no dey alive today.

Meanwhile e neva too tey di US ambassador to Nigeria meet wit am wit di imam and some leaders of Nghar village.

Di Plateau state Governor Simon Lalong announce oga Presido wan see di Imam for one peace and security conference. Di governor say na di whole kontri di Imam save as 300 pipo no be small number.

Yakubu Datti wey be tok tok pesin to di govnor tok say as Presido Buhari no dey town wen di tori land, dem need to confam di time and date wen di presidential handshake go take place.

Governor Lalong add say belle dey sweet am say na for im tenure dis kain tin happen and na only God fit reward di Abubakar.

Topics Wey Dem Resemble

Another thing we de for inside dis tori