Leah Sharibu: 'My morale high wen I hear her voice' - Leah papa

some of di Dapchi girls wey dem just release.

Wia dis foto come from, Reuters

Wetin we call dis foto,

Bring Back Our girls Campaigners say, even though Dapchi girls don return to dia family, dia future still no pure as Boko Haram cut warning give dem make dem no go back school.

Almost 190 days afta Islamic militants kidnap Leah Sharibu from Dapchi, her papa Nathan Sharibu on Tuesday tell BBC News Pidgin im still get hope say im go see im pikin face one day.

Tori be say one voice recording of Leah show for Cable News tori pipo on Monday from where she dey since February wen Boko Haram kidnap her join di oda 109 Dapchi school girls wey dem bin free, remaining her.

"E dey real, na her voice. I bin tink say she don kpai but my morale high as I hear my favourite pikin voice", Nathan Sharibu tell BBC News Pidgin on Tuesday.

"My wife confuse wen she hear our pikin voice because she dey hear voice, she no see her pikin. I bin tink say she no even dey alive but her voice don give me hope", Nathan tok.

Na she be di only remaining school girl from di February kolobi wey still dey di hand of di Islamic militants wey no gree to free her.

Wia dis foto come from, Getty Images

Garba Shehu, wey be tok-tok pesin for President Muhammadu Buhari, tok say dem still dey check recording to make sure say na she tok am.

Islamic militants bin kidnap Leah Sharibu and 109 oda school girls from Dapchi. Di militants bin release all di oda girls but na only Leah wey be di only Christian among di girls still remain for di militants hand.

Wia dis foto come from, ISAAC LINUS ABRAK

Wetin we call dis foto,

E don reach almost 190 days wey Leah don dey di militants hand

Oga Sharibu say since wen im pikin loss reach now, im neva hear pim from goment or any yarns about di release of im pikin from anybody wey fit dey arrange her release.

Nathan Sharibu believe say im go see Leah again but im beg goment make dem release im pikin to am.