Missing General #JosPond: Our life no dey safe, soldiers dey intimidate us - Dura-Du district resident

Image example Jos Pond of Death dey inside Dura-Du district for Plateau central Nigeria

Pipo for Dura-Du district for Jos South, Plateau state central Nigeria catch fear since beginning of September, so-tey dem abandon dia house and business run comot for dia community.

Wetin dey cause all dis fear na say Nigeria military kontinu dia search operation to find di missing General, Mohammed Idris Alkali wey soldier discover im car inside one pond for Dura-Du district.

Di pipo now di say dia life no dey safe again on top di brutal way military dey do dia work.

But tok tok person for 3 Division for Jos, Col. Kayode Ogunsanya say dat one na fat lie and dat na di pipo di run from di village by themselves.

Wia di palava dey come from

Yakubu dey live for Dura-Du district for Jos South
Image example Yakubu dey live for Dura-Du district for Jos South

On di 2nd of September, 2018 members of di community bin dey morn as some gunmen bin enta dia village and start to killi-killi anybody wey dem see. Dat day alone, dem kill 15 pipo including one pharmacist wey dey return from work.

"Dem bin wear army uniform, enta di community for afternoon and even relate wit dey pipo" " we think say dem bin genuine military pipo na later in dey evening n aim dem come dey shoot abd butcher pipo any how" One of di resident, Yakubu tell BBC pidgin.

Patrick Nyam wey bi di oga kpata-pkata of Berom Educational and Cultural Organisation say di way di gunmen attack di area and di pain and heartbreak wey dem leave for di mind of mama and papa dem no be here.

E explain give say di entire community bin dey devasted. " Two military checkpoint bin dey di area but dem no fit help prevent di killing of our pipo" "Dem kill our pipo dem like chiken and no body talk anything" im explain.

Patrick Nyam
Image example Patrick Nyam

Di circle of revenge and how e start

Di kasala on top indigene rights and political representation for Jos wey start for 2001 don turn big community wahala wey don claim plenti life and wound plenti pipo Women and pikin dem dey most affected.

How di tin dey happun be say if armed men attack any Berome community, di pipo go quickly think am say na Fulani herdsamen and because dia settlement pattern, di pipo go mobilise go road start to dey kill any muslim person wey dem see as dem consider dem as brothers.

Some odas go even enta Muslim community start to di attack dem as part of " do me, I do you" and na so di Muslim pipo sef dem dey do and dey tin don turn circle of revenge and blood shed for di area.

And dis no be di first time wey dis kain tin dey happen. Dis na why some security analyst believe say General Alkali fit don fall victim to di mob attack

Tori be say e never too long General Alkali retire from di Nigerian Army, so as im bin dey go Bauchi to go see im farm on di 3rd of September im loss since den.
Image example Tori be say e never too long General Alkali retire from di Nigerian Army, so as im bin dey go Bauchi to go see im farm on di 3rd of September im loss since den.

Search Operation kontinu

Di military don kontinu to evacuate di pond plus launch search operation for di area. So far dem don find 3 vehicles from di pond and dem say dem no go stop until dem see di end of di whole tin.

But di pipo say di soldier dem dey break into dia house anyhow, beat dem and arrest dem without respecting dia fundamental Human rights.

"Dem don arrest 38 pipo including women, some of dem bin dey church wey dem come carri idem" " Di military pipo say dem bin go release dem, but notin don happun" Patrick explain.

E explain give say over di years, some motor don accidentally fall inside di pond wey don dey di community tey tey.

"Di Amalgamated Tin Mines of Nigeria bin give di goment moni to reclaim di area so dat di pipo wey be farmers fit use am" "But goment no do anything and dis don land our community for wahala" Patrick explain.

Military pipo don take over di community and dem no dey allow pipo enta and even when our reporter request to go to see wetin dey happun for di community, di military refuse.

Army see only three motor inside Jos pond, but wia di rest dey come from?

Jos Pond Image copyright Twitter/Nigeria Army
Image example Na since September dem begin find Major General Idris M Alkali rtd and dis na im car for Jos pond.

Nigeria Army tok Thursday October 4 say di tori wey dey spread for social media say dem don recover 11 motor and two deadi bodi na fake news.

Di soldiers say na only three motor dem don see for Du pond for Jos town wia dem dey investigate one retired army General wey miss.

Dis mata of Major General Idris M Alkali rtd wey miss since September don lead to oda tins wey army don find out and di mata dey shake town.

Tori from di 3 Division of Army for Plateau state, central Nigeria wey dey investigate di disappearance of di General tok say di tori wey dey spread for social media say dem don recover 11 motor and two deadi bodi na fake news.

According to press release wey Army tok tok pipo give tori pipo dem tok say, ''Dem don draw ear give Headquarters 3 Division Nigerian Army tori wey dey spread for social media on top di former Chief of Administration Major General Idri M Alkali (retired) wey miss''.

''For social media, tori say na eleven motor and two deadi bodi we recover na fake news'', Nigeria Army still tok.

Nigeria Army still tok say, ''Di Headquarters go like appreciate pipo wey get interest to find di senior office wey miss''.

Di soldiers dem share informate wit BBC News Pidgin say di three motor wey dem don see include;

  • Black Toyota Corolla motor wey belong to di missing general wit Kwara registration number
  • White Toyota Hiace bus wit Plateau state registration number
  • Red Rover motor wit Bauchi registration number

Di soldiers tok say di tori wey dey spread for social media say dem don recover 11 motor and two deadi bodi na fake news.

Tori be say, General Alkali miss as im dey travel through Jos last month.

Army don deny claim say dem comot one deadi bodi wey be di retired general.

Chief of Army Staff, Lt. General Tukur Yusufu Buratai don give special task force order make dem quick quick find di general dead or alive.

Pesin wey no gree make BBC Pidgin mention im name say di task force don arrest at least 100 pipo for Du on top dis mata.

Another thing we de for inside dis tori