Shiites: Times wen Islamic Movement (Nigeria) don kwanta wit security agents

Shiites: Times wen Islamic Movement (Nigeria) don kwanta wit security agents

Some resident of Abuja Nigeria’s capital say dia mind no settle at all on top wetin go happun if members of di Islamic Movement of Nigeria do dia Arbaeen waka today.

Di na sake of say di one wey di group do for Zuba area, on Saturday bin cause kwanta between dem and military and three pipo die.

Meanwhile security don beef up for different strategic location for di capital. Around di Nyanya-Nasarawa axis, dey tin sef don cause plenti go-slow.

See times wen Islamic Movement (Nigeria) don clash wit Security agents

12 December, 2015 - Nigerian army kill plenti Shia Muslims for Zaria, Kaduna State. Di military bin accuse di Shia say dem wan kill one Army oga. Na so dem open fire on di pipo wey dey pray for Hussainiyyah Baqeeyatullah, wey bi religious centre of di Islamic Movement of Nigeria (IMN).

13 December, 2015 - Nigeria Army bin raid di house of IMN leader and tori be say more dan 300 pipo die - including three of El-Zakzaky pikin, and dem arrest and detain El-Zakzaky and im wife.

7 January - 2018 - Two students die for di hand of security forces during protest Zakzaky release for Kaduna, northern Nigeria.

16 April, 2018 - Tori be say at least one pesin die and plenti injure afta members of IMN follow police clash for Unite Fountain, Abuja, di kontri capital. IMN accuse police say dem use live bullets and tear gas to by force scatter dia protest for di release of dia leader Ibrahim El-Zakzaky.

23 April, 2018 - Police in FCT Abuja, di kontri capital clash wit members of IMN afta dem carri protest go di National Human Rights Commission to demand release of dia leader, Ibrahim El-Zakzaky. Authorities arrest 115 members of di joinbodi.