Lagos State Emergency Management Agency say na poor building materials and workmanship fit don make one house to fall yakata for Ikoyi area for di state.
One pesin die and four pipo wunjure for di incident wey happun on Friday according to LASEMA.
Oga of LASEMA Dr Oke-Osanyintolu tell BBC say "we dey go back to di construction site dis morning to stabilise di remaining structure make e no become danger to di public"
One pesin wey bin dey inside di building wen e collapse tell BBC say "before di building collapse, I dey up, I bin dey work. I tink say na rain dey fall. E get pillar wey dey front of me, I run enta there because I no know wetin dey happen. As I turn back, I see say di whole house don collapse". na wetin di eyewitness tok
"We see one of our guy hand, Everest dey call for help. For me to come down dat time, e hard, plenti pressure bin dey like say no be me dey there sef. So I gats jump, wen I come down, we come rescue Everest. Na dat time dis guy dey say im friend dey dia". na wetin im ad put
Dis building collapse dey come three weeks afta one building collapse for Magodo area for di state wey kill four pipo for 12th October.
Ikoyi na di most expensive area to live or rent or own property for Lagos.