Sowore: We go cari DSS go court - Falana

Omoyele Sowore Image copyright Other

Lawyer for di #RevolutionNow converner Omoyele Sowore don threaten to cari Nigeria Department of State Service (DSS) go court.

Senior advocate of Nigeria lawyer Femi Falana, wey bi di head lawyer for Sowore say, dem go "cari DSS go court, make di goment put dem for prison."

Oga Falana dey para afta DSS still neva gree let Sowore and im co-defendant Olawale Bakare waka even though dem make all dia bail conditions.

"Nobody get power pass the court," na so im tok.

"Pesin wey court say make una release from prison, una say no, im go dey prison by force. Di law wey dey Nigeria no gree for dis kain anyhow behaviour.

"We no go gree for dem because we no be slaves for dis kontri."

Oga Falana add say, for all di days dem put dem for prison illegally, we go also go court ontop am too to ask goment for sorry, no vex money.

Sowore still dey DSS custody

Nigeria Department of State Service still dey hold di convener of #RevolutionNow protest even though court don give warrant for im release.

Sowore and im co-defendant Bakare still dey DSS hand afta Justice Ijeoma Ojukwu of di Federal High Court for Abuja, sign warrant make dem release dem on Wednesday.

Anoda of Sowore lawyer Marshal Abubakar, say afta di court serve di warrant to di security agents around 10am on Thursday, "dem say dem go call us back."

DSS bin arrest di publisher of Sahara Reporter Sowore and im co-defendant Bakare, put dem for custody for more dan 90 days afta dem call for protest wey dem call #RevolutionNow.

On October 4, Justice Ijeoma Ojukwu bin grant dem bail wit conditions wey dem bin no fit meet.

Afta di two defence apply, di judge reconsider di bail conditions and now d defendants don finally meet am.

Topics Wey Dem Resemble

Another thing we de for inside dis tori