'Fatoyinbo still be suspect for court' - Dakolo Lawyer
Di case between Busola Dakolo and COZA pastor Biodun Fatoyinbo "still dey court".
Na wetin her lawyer, Pelumi Olajengbesi tell BBC Pidgin say di motion wey di court look inside on Thursday na about di counter claim say time don pass wey dem dey bring di case come court.
- Di 10 million naira no be compensation, na for legal fees - Busola Dakola lawyer
- Police don arrest pastor Biodun Fatoyinbo
Pelumi say: "Fotoyinbo no dey free by court, e remain as accused on di time when di court free am. Di koko e want now be say, make court no make am to tok as di mata happun long time ago."
E tok dis one on top tori wey dey spread on top social media say di court don free oga Fatoyinbo.
Justice Oathman Musa for im ruling on Thursday tok say di case dey "empty and get sentiments". E also order Ms Dakolo to pay one million Naira as dem waste di court time.
Tori be say di pastor and im lawyers dem bin counter di original motion say e don tay wey di mata happun but oga Olajegbesi tok say wetin dem dey fight for na "di continuous emotional distress wey e cause our client."
Bukola Dakolo, wey be di wife of musician, Timi Dakolo and popular Nigerian fotographer accuse di Commonwealth of Zion Assembly (Coza) pastor, Biodun Fatoyinbo for July say im rape her two times before she turn eighteen.
Di mata turn serious one as e lead to heavy protest and later di pastor step aside from pulpit.