Real Madrid don win FIFA Club World Cup
Real Madrid don become di first club to win FIFA Club World Cup competition back-to-back as Cristiano Ronaldo score di only goal for di final match against Brazilian side Gremio.
Zinedine Zidane team bin dominate di match from di beginning but later find am difficult to score against di Gremio wey dey very organised.
But after 53 minutes, Cristiano Ronaldo fire correct free kick to score di only goal wey Real Madrid take win competition wey happen for Abu Dhabi, UAE.
E mean say like Barcelona, Real Madrid don carry di trophy 3 times now. For 2014, 2016 and now 2017.
Dis na di 14th edition of di competition wey FIFA dey organise for international clubs wey bi champion from di six confederations wey FIFA recognise for di world.
Gremio dey play for dis competition for di first time but 3 other clubs from Brazil don win am 4 times before, including Corinthians wey win am for 2000 - di year wey dem first begin di competition and 2012.
Ronaldo, di match winner, na di current Ballon d'or award winner for 2017.