Leicester City owner dey inside helicopter crash outside King Power Stadium
Di owner of Leicester City helicopter crash for one car park outside di club ground as e just fly out of di stadium from one Premier League match.
Vichai Srivaddhanaprabha bin dey inside di helicopter wen e fall down around 20:30 BST (8:30pm Nigerian time) on Saturday, one pesin wey dey close to di family don tell BBC.
Freelance photographer Ryan Brown wey bin dey cover di game see di helicopter korokoro for di King Power Stadium before e crash.
Im tell BBC Radio Leicester: "Di engine stop and I turn round and e make one small whirring noise, wey be like one grinding noise.
"Di helicopter just quench, I turn round and e just dey spin, out of control. And then na big bang burst and then big fireball."
Early morning on Sunday, Leicestershire Fire and Rescue Service Assistant Chief Fire Officer Andrew Brodie tweet say im just leave "multiagency strategic meetings" for Leicestershire Police HQ.
E come describe di crash as "serious and sometin wey no end well", adding say: "Abeg make no bodi dey spread rumour. Tink of families, friends, pipo wey dey respond, and @LCFC and dia fans."
27 year old Leo Bruka wey dey live near di stadium, tell BBC 5 Live say im see two police officers wey car dey near di crash scene.
"One of them bin dey look for somethin and di oda one, he run straight to di helicopter and im bin dey try to break win window," Im tok.
"Then fire explosion happun and dem pull back because di fire bin dey too hot."
One witness say im see Leicester player Kasper Schmeichel run out of the stadium dey go wia di crash happun.
Nobodi don sabi how many oda pipo bin dey on inside di helicopter.
One witness say im hear "one big bang" and then see "one big fireball"
Leicester bin draw 1-1 against West Ham United for di King Power Stadium.
Under oga Srivaddhanaprabha ownership, Leicester City win di Premier League for 2016.
We eye still dey dis tori wey just land and we go bring una more as e dey comot. Make una load di page again to see di full tori.