AFCON 2019: Why CAF fit don comot host rights from Cameroon hand
Delay for complete some stadiums dem, security situation for Anglophone regions and Boko Haram fight fit be de reasons why di Confederation of African Football, CAF comot de 2019 African Cup of Nations hosting right from Cameroon hand.
On Friday, di join-bodi wey dey run tins for African football CAF bin post ontop dia twitter handle, say deh take de decision afta dia executive meeting for Ghana, but dem no give reason why.
Dis one dey happun only seven months before de tournament suppose start.
- AFCON: CAF never inspect Cameroon
- Iwobi, Partey, Musa, Salah, and 30 odas go drag CAF men player of di year
Cameroon don delay for build some stadium, laik de Olembe 60,000 seater for Yaoundé weh work still de go on and Japoma 50,000 place for Douala.
De last Caf inspection mission no give informate for weti de see but no bi secret say Cameroon delay for finish some stadia.
For dia report, dem bin tok about slow work and security for Anglophone regions and even Boko Haram for Far North.
Roads dem for komot one town go anoda one and for inside de host town na still problem.
- Cameroon separatists 'bomb' military moto for Kembong
- Craiy die for Bamenda food market as fire burn around 200 stores
Security na anoda issue for Cameroon. Dem di fight Boko Haram for Northern part of de kontri and one of de site Garoua na for northern region close to Far North weh Boko Haram don make life difficult for population wit attacks.
Anglophone crisis for Northwest and Southwest weh e don crumble de regions di also pose big security problem. Buea weh na one of de sites don witness plenti fights between goment forces and separatist forces.
Deh go launch search now for new host kontri sharp sharp and afta two week deh go givam for de kontri to host AFCON for June next year.
Northern African kontri bin deh wait for take de place for Cameroon and deh di support Morocco for host since deh bi ready since.
Goment bin don put plenti moni for host de competition even investment.
For now Kontris weh deh want host get laik two weeks for apply.
Even Samuel Eto'o Fils no bi fit safe Cameroon as e bring Caf President for kontri and bin wan organise gala match with big players laik Messi and music star Rihanna.