Afcon 2019: We don sort out Super Eagles allawee mata - NFF

Nigeria Super EAGLES Image copyright Getty Images

Nigeria Super Eagles tok-tok pesin Toyin Ibitoye say dem don sort out di bonus, allawee mata wey bin dey ground.

Dis wan dey come afta di Super Eagles Vice Captain Ahmed Musa bin tok for press conference on Saturday morning say dem "never receive anytin (money)" from di kontri football federation.

Before dia match against Guinea, di Super Eagles bin delay training by one hour sake of meeting wey dem bin dey do to trash out dia $10,000 match bonus, allawee mata.

For di pre-match press conference before dia last game on Sunday for group B, Musa tok say di players "never receive anytin, maybe before im go back sometin fit happun."

"But di players go make sure say dem give everytin," for dia last group match against Madagascar even though di "sun affect dia last performances" for di competition.

Image copyright Getty Images
Image example Nigeria coach Gernot Rohr and Ahmed Musa fpr di pre-match briefing

Di Nigeria Football federation wey dey receive dia spend money from gofment bin deny say dem dey responsible for di delay of payment.

Ibitoye tell BBC say e dey important now say everybody go stop to dey tok-tok about di mata and focus on di football pitch.

"We appreciate gofment and di NFF say dem react quick-quick." Na so Ibitoye tell BBC.

Di BBC get info say di team wey don dey togeda since early June, don collect dia camp allawee from 9 to June 30.

Ahead of di game for Alexandria, Nigeria coach Gernot Rohr say im go make changes and im dey confident of Nigeria chances to win di competition.

Meanwhile, President Muhammadu Buhari don nominate President of the Senate, Ahmed Lawan as leader of di Federal Government delegation to di 2019 Africa Cup of Nations finals.

Oda pipo wey dey di delegation na Speaker of the House of Representatives, Femi Gbajabiamila; Govnor Ifeanyi Okowa and Babajide Sanwo-Olu of Delta and Lagos States plus di Central Bank Govnor, Godwin Emefiele.

Topics Wey Dem Resemble

Another thing we de for inside dis tori