Nigeria vs Lesotho result: Victor Osimhen, Etebo Oghenekaro, Paul Onuachu goals give Super Eagles 3-0 victory against Lesotho

Victor Osimhen

Wia dis foto come from, Getty Images

Nigeria complete di qualification phase for di 2021 Afcon wit unbeaten record afta dem defeat Lesotho 3-0 on Tuesday.

Napoli striker Victor Osimhen na im open di scoring for di 23rd minute as di Super Eagles mark dia return to playing in Lagos wit victory over di crocodiles of Lesotho.

Midfielder Oghenekaro Etebo goal for di 50th minute through Victor Osimhen assist put di Eagles for cruise control of di match early for di second half.

Substitute Paul Onuachu come seal di three points for match wey 30% of fans witness inside di Teslim Balogun stadium.

Dis na Onuachu second goal in two matches following di one wey im score for Nigeria against Benin Republic last Friday.

Victory over Lesotho ensure say di Super Eagles finish di qualification round for di 2021 Afcon wit unbeaten record.

Nigeria also finish as winners of Group L wit 14 points as dem record four wins and two draws.

For Lesotho, dis defeat confam say na dem go finish bottom of di group.

Cameroon na dem go host di 33rd edition of di continent football showpiece afta Confederation of African Football postpone am earlier due to Covid-19.