Nigeria: Government don confirm two more yellow fever cases

Syringes Image copyright Getty Images

Nigeria government say dem don discover two more cases of Yellow Fever for Oro Ago, inside Kwara State wey dey for north-central part of di country.

Dis time na one boy and one girl get di disease; dem bi ten years, and 14 years for age.

Di ministry don carry blood from 38 people from di local government take enter University of Ilorin Teaching Hospital, for di state capital.

Sulaiman Alege, wey be di State Commissioner of Health, say people plenty for Oro Ago, and di mosquitoes wey dey bite dem for there no bi small.

On 18 September na im Nigeria Federal Ministry of Health say one girl don die of Yellow Fever for di same Kwara State.

Professor Isaac Adewole, wey be di country minister of health, say e happen for Oke Owa community, Ifelodun local government area.

Im say dem don send 'Outbreak Control Team' wey go take quick decision on top di matter.

Image copyright Getty Images
Image example Doctors say di best way to prevent yellow fever na to take di vaccine.

Wetin be Yellow Fever?

Yellow Fever na virus disease wey dey cause serious bleeding - na one type of mosquito wey be Aedes dey cause am.

Person wey get am fit get headache, fever, jaundice, muscle pain, vomiting and tiredness.

Some people wey get am no dey even know say di disease dey their body. When di sickness too bad, blood fit begin comot from di patient nose, mouth, eyes or stomach.

Work don start

As things dey now, different government organisations don join hand with World Health Organisation to help Kwara state understand how bad Yellow Fever dey bi.

Professor Adewole say dem don "start campaign to do vaccination for di area wey e happen, so dat e no go spread."

If people take di vaccine, dem no go need another one till after ten years.

Topics Wey Dem Resemble

Another thing we de for inside dis tori