Niger: US don confirm soldiers wey die for ambush
Di US military Africa Command don confirm say true-true, three of their soldiers die, and two others dey wounded inside attack for Niger, near di border with Mali.
Na for statement na im di Command say di two US soldiers wey injure don reach Landstuhul Regional Medical Centre for Germany, where dem dey receive treatment.
Di attack happen 200km north side of Niamey, wey be di capital of Niger.
White House spokeswoman Sarah Sanders say US President Donald Trump don already hear everything about di matter from im chief-of-staff wey be John Kelly.
Di US army don dey provide training to Niger army to help fight Islamist militants for di region, including di North African branch of terrorist group al-Qaeda.
Na early morning na im tori come out say three US and five Nigerien soldiers die.
Ds na di first time wey US soldiers dey die for di country since di US Africa Command enter there.
Officials say dem never know who fire di soldiers.
One militant group wey be partners of al-Qaeda dey active for di region and don conduct cross-border raids before.