Nigeria: Court don ask Senator Abaribe where Nnamdi Kanu dey
Federal High Court for Nigeria don tell one of di country senator; Enyinnaya Abaribe and two other people to explain where IPOB leader, Nnamdi Kanu dey.
When court bin give Kanu wey be leader of di Indigenous People of Biafra bail for April 2017, Senator Abaribe, Immanuel Shalum Okabenmabu and Tochukwu Uchendu bin stand as sureties for am.
Wetin dat one mean na say three of dem go dey responsible to bring Nnamdi Kanu come court, when time reach.
Justice Binta Nyako wey siddon for di court for Abuja, wey be capital of Nigeria, say make di three people bring Kanu come court, or make dem ready to pay about $277,750 (N100m) each, wey be jail bond, or make dem ready to go jail.
Justice Nyako give di order today as dem siddon again to hear case of treasonable felony wey dey Nnamdi Kanu and three other members of IPOB head.
Di judge bin give di senator three options:
- Make Abaribe produce di defendant (Kanu) for court and then apply to comot as surety.
- Make Abaribe dey ready to forget im N100m bail bond.
- Make Abaribe request make dem give am more time to produce Kanu for court.
Lawyer to Senator Abaribe wey be Ogechi Ogunna bin tell di judge say di senator no go fit do any of those things.
But di judge strong leg, say im must do one. Na im di lawyer come choose option three, say make court give dem time to produce Kanu.
Di trial against di leader of Indigenous People of Biafra, (IPOB) Nnamdi Kanu, start today, but di man wey dey accused of treason against Nigeria no dey court.
Di matter serious sotay im lawyer say e no know whether Kanu dey alive, or whether im don die.
Di case still continue, and di court say dem go resume di matter on November 20.
Nobody don carry eye see Mr Kanu since September, after court for di capital, Abuja approve wetin Nigeria Army bin talk say im group, di Indigenous People of Biafra (IPOB) na terrorist organization.
E no dey clear how di trial wey dey happen for Abuja High Court go waka.
Di IPOB Leader bin don spend like 18 months inside prison before one High Court for bin give am bail for April dis year.
Na dat time di court put 17 October as di date to begin im case on top charges wey concern treason against Nigeria, attack against government security and so on.
Meanwhile tori be say Army don talk say dem no know where Mr Kanu dey, but im relatives dey point hand back say dia broda dey inside secret cell, after dem attack im family house on 14 September.
Mr Kanu lawyer wey be Ifeanyi Ejiofor, dey halla say na only Nigeria army know where im client dey now.
But Orji-Uzor Kalu, one before-before Governor for di eastern Nigeria state Abia bin tell local media dat same time say di IPOB leader dey London.
Wetin IPOB Be?
Dis na separatist group wey call demself Indigenous People of Biafra - dem wan break away from Nigeria to form dia own country; Biafra.
IPOB people dey feel say since after Nigeria 1967 civil war, dia region for south-east side no dey develop as dem want am, so na to separate from Nigeria na im dem see as di only choice dem get.
Na mainly five of di 36 states for Nigeria wey be Abia, Imo, Enugu, Ebonyi and Anambra na im IPOB dey hope to take form Biafra country one day.
But now, Nigeria government don ban IPOB, still call dem terrorist organization.