Buhari wan end 'madness' wey kill 20 people for Plateau

Cows on top road Image copyright Getty Images
Image example Di fight-fight for Plateau state na on top who get right use land to feed cow

Nigeria president don put order for ground say make police and di army 'stop di madness' for central Plateau state, after 20 die for di most recent clash for di area, early dis week.

Tori be say na some - herdsmen wey dey gather cow and come from di Fulani tribe - dem dey suspect as those wey do di killings, and di fight na over who get right to use land.

"Di attackers come as big group nd for di first time, dem no only shoot their victim but dem come use explosive join," na wetin di spokesperson of di state Special Task Force, Salisu Mustapha, talk.

Dis attack on top Christian farmers, no respect di curfew wey di state governor bin arrange on Friday, wey suppose reduce di vex-vex wey dey between di two communities.

Na so official statement say: "President Muhammadu Buhari don sad well- well, as im hear di tori say dem kill at least 20 people for Plateau state, for wetin be like revenge attack by some herdsmen."

Image example Nigeria president no happy with all di kill-kill for Plateau state

"Dis madness don go too far; (Buhari) don instruct di military and di police say make dem no only end di kill-kill now now, but to make dem do plan wey go make sure say dis kind attack, by one group against di other, no happen again," na im di presidency statement add put.

For Plateau state, tension dey always high, sotay more than 10,000 don die since 2000; dis na according to sabi people wey dey follow di matter.

Topics Wey Dem Resemble

Another thing we de for inside dis tori