Kenya: Election body chairman wan comot some of im staff
Wafula Chebukati wey be chairman of di electoral commission (IEBC) for Kenya don ask some of im staff to comot, so dat free, fair and credible election fit happen next week.
Dis one dey happen just hours after one key commissioner for di election body resign, run go US.
But as all dis one dey happen, IEBC chairman Chebukati strong mind say di repeat presidential election go still hold next week as dem bin plan.
Im also warn politicians to stop to dey put hand inside wetin di commission dey do, and im don invite everybody to siddon talk.
Opposition supporters for Kenya don dey protest for weeks now, say make CEO of di commission - Ezra Chiloba, resign. But one high court rule say Mr. Chiloba no do any bad thing.
Di main opposition leader, Raila Odinga, bin withdraw from di race last week.
Today bin break with tori say Roselyne Akombe wey be top commissioner for di Independent Electoral and Boundaries Commission (IEBC) resign.
She bin tell BBC say di IEBC dey under political "siege", as dem no dey fit agree on anything, and dem no dey fit take decision.
Her mind na say all dis one fit cause palava wey go mean say Kenya fresh election for 26 October fit no dey credible.
Na for interview with di BBC Newsday programme na im she say: "e dey very possible say di mistake wey some of di presiding officer make during di last election, go repeat demself."
Ms Akombe dey for New York; she say she run go there because she dey fear well-well, after dem don threaten her up and down on top dis election. People even threaten her brother join.
Di Supreme Court bin cancel di original 8 August election wey dem bin declare President Uhuru Kenyatta as winner, after dem find say di thing no go smooth.
Na IEBC bin say Mr Kenyatta win with 1.4 million votes - or 54% of all di vote, while Mr Odinga carry di remaining 45%.
Political parties dey face demself
Raila Odinga, wey dey lead di opposition - di National Super Alliance (Nasa) - talk last week say: "We don look everything, decide say di IEBC no ready to change di way dem dey do things, or replace dia workers."
"Di way things dey look, di 6 October election go dey worse than di last one."
Mr Odinga don dey organise different protests against IEBC.
But im opponent President Kenyatta say im dey ready to go ahead with di fresh election.
"We no get problem to go back, do elections. We dey sure say we go get more votes than di last time."