Kenya Election: Supreme Court no fit decide

Dem no support media player for your device
Kenya election: BBC Pidgin don dey ground

Kenya Supreme Court no fit siddon dis morning, to decide if tomorrow rerun election suppose happen. Na only two of di seven judges wey suppose decide di case, come court.

Di court bin suppose siddon dis morning to rule on one petition whether tomorrow 26 October 2017 election suppose happen or not.

Dem say na for future date wey dem no give, dem go decide on di mata.

As e be, di election suppose happen tomorrow.

If election no happen before November 1, na im be say di country go enter wetin dem call constitutional void.

Who go contest?

According to di ballot papers wey dey ground, na seven people name IEBC print; Jubilee Party candidate President Uhuru Kenyatta, National Super Alliance own wey be Raila Odinga, plus Thirdway Alliance candidate Ekuru Aukot, Alliance for Real Change dia own na Abduba Dida, then Independent candidates still dey, wey be Michael Wainaina, Joseph Nyaga and Japheth Kaluyu.

For di 8 August presidential election, na eight candidates contest, but on October 13, di country electoral commission remove di name of Cyrus Jirongo, after High Court declare am bankrupt on October 10.

Mr Odinga name no suppose dey inside di ballot paper because in don first talk say im no follow contest again. E bin talk dis one before di election commission go print new ballot paper.

But because of palava about say Mr Odinga no sign one form 24A wey suppose show say im really no wan contest, dem force im name enter ballot paper even though im still dey say e no do again.

Election go happen on October 26?

Image example President Uhuru Kenyatta say im dey ready for di 26 October election, but opposition leader Raila Odinga say im no do

Even though plenty last minute drama just dey happen up and down, nothing really fit stop di election on Thursday.

Kenya lawyer Kamotho Waiganjo say di main challenge na say di country Constitution no ever imagine say dis kind thing go happen, so e no get many answer to solve di palava wey dey ground now.

Members of diplomatic community from other countries say "Kenya constitution dey remarkable."

Dem don advice Kenya politician dem say make dem make sure say dem find solution inside di country laws, wey go fit handle different situations like dis.

Wetin be di legal matter wey fit stop dis elections?

  • If di national returning officer, wey be di election commission chairman Wafula Chebukati, wake up say im no do again.
  • Then di presidential election no go fit happen without di national returning officer as na im responsibility to prepare and handle di presidential election, according to Kenyaelectoral Act .
  • If IEBC go Supreme Court to ask for advisory opinion, or if voter go High Court to ask make dem delay di election. Already, three people wey be Khelef Khalifa, Samwel M. Mohochi and Gacheke Gachihi don petition IEBC and im Chairman for Supreme court; dem do dis one on 24 October, and di hearing na 10am on 25 October.
  • If no single voter appear to vote for one constituency, then e mean say election no happen for dia. Mr Odinga don already tell all im supporters make dem siddon for dia hous eon election day. Whether dem go obey am or not, nobody know.

Another thing we de for inside dis tori