Zimbabwe: President Mugabe don sack vice president

Robert Mugabe talk say di vice president dey free to carry im supporters go join another party. Image copyright Getty Images
Image example Robert Mugabe talk say di vice president dey free to carry im supporters go join another party.

Zimbabwe President Robert Mugabe, don sack im vice president- Emmerson Mnangagwa, as e be say plenty-plenty people don dey support am openly.

For statement wey di country information minister Simon Khaya Moyo release, dem sack di vice president because im don show sign say im no get respect, im no dey reliable and im no dey loyal.

For weekend, President Mugabe accuse Mnangagwa say im pay people wey dey support am to shame im wife. Di First Lady, Grace Mugabe, bin go one rally for di second city of Bulawayo wey di supporters begin hala "woo, wooo" give her.

President Mugabe wey vex full im belle bin talk say e no go tolerate di constant insult wey dey come from di vice president supporters again.

Di 93-year-old president also talk say Mnangagwa dey free to take im supporters and form e own party.

Image copyright Getty Images
Image example Emmerson Mnangagwa supporters booed di First Lady for one rally wey she go.

BBC tory person for Harare, Shingai Nyoka, report say wetin happen dat Saturday, na di most open way wey show di war wey dey between Mnangagwa and Grace Mugabe.

Many people been think say Mnangagwa fit take over from Mugabe while some other people now believe say dem fit appoint di First Lady as vice president take replace am.

Di woman wing of Zanu-PF party wey Grace Mugabe dey lead don dey push make dem amend di party constitution so dat one of di two deputies go be woman.

Di First Lady wan organize wetin she call "Super Sunday" rally with religious groups on Sunday 5th of November.

Topics Wey Dem Resemble

Another thing we de for inside dis tori