Nigeria: Former vice president Alex Ekwueme don die for London
Nigeria former Vice President, Dr Alex Ifeanyichukwu Ekwueme don die at di age of 85 years.
For di statement wey dem release, dem say na 10:00pm im die for London clinic on Sunday.
Na some weeks ago wey im fall for im house for Enugu, south east Nigeria, wey dem rush go neurosurgery hospital before im enter coma.
Last week President Muhammadu Buhari give order say make dem fly am go London after im stabilize small for hospital.
Di 85-year-old architect na Nigeria first elected Vice-President wey serve from 1979 to 1983.
Who be Alex Ekwueme?
Alex Ifeanyichukwu Ekwueme become vice president to Shehu Shagari for 1979 for Nigeria's second republic.
Im party, di National Party of Nigeria rule di country for four years and dem win second term for 1983 election but Muhammadu Buhari - wey be di current president - carry di military chase dem comot for government.
Ekwueme bin go school for Nigeria, London and di United States where im collect degrees for sociology, history, philosophy, architecture and law.
Di former vice president na one of di people wey start di People's Democratic Party wey rule Nigeria for sixteen years before Muhammadu Buhari win dem comot for government with im All Progressive Congress party for 2015.
Ekwueme die for Sunday after im struggle with chest infection.
E pain me
Senate President, Dr. Bukola Saraki talk say e pain am to hear say Ekwueme don die.
For statement wey im Special Adviser on Media and Publicity, Yusuph Olaniyonu carry comot, Saraki hail di way di former vice president take put mind for Nigeria mata and how di country fit develop.
Im say e no common to see di kain leader wey Ekwueme be.