Mnangagwa: Zimbabwe 'Crocodile' na di new president after Robert Mugabe

Emmerson Mnangagwa Image copyright AFP
Image example Emmerson Mnangagwa don dey around Zimbabwe top power for more than 20 years

Zimbabwe don swear in Emmerson Mnangagwa, 75, as interim president and commander-in-chief.

Dis don end di palava for inside government wey force former president Robert Mugabe to waka comot from state house on Tuesday 21 November 2017 after di Zimbabwe military takeover for a few days.

Mnangagwa na long time loyal Zanu-PF senior member and very close supporter of Robert Mugabe but on 6 November, 2017, Mugabe sack Mnangagwa as di vice president of Zimbabwe, and na dis one make di military chook hand inside di whole matter to change di country leader.

Na for di national sports stadium dem swear in Mnangagwa, in front of thousands of im supporters, very important people and foreign diplomats.

President Robert Mugabe don resign

About Emmerson Mnangagwa

Dem born Emmerson Dambudzo Mnangagwa for southwestern Zvishavana district, central Zimbabwe on 15 September 1942. Im finish primary school for dia before im family run go Zambia.

Im grandpapa na traditional leader and im papa na I-no-gree person wey dey fight di white people for Zimbabwe and dia laws wey no favour di black people.

For 1966, Mnangagwa bin join I-no-gree group wey dey fight to get independence from Britain, and na for dia dem send am go do military training for China and Egypt.

Dem arrest Mnangagwa, come sentence am to death but later dem reduce im sentence to 10 years for prison because of im young age.

After di independence for 1980, tori claim say im dey in charge of kill-kill of thousands of opposition ethnic group wey be di Ndebeles from Matabeleland and Midlands area.

Mnangagwa be person wey people believe say get plenty money and im fit use dis one take enter power.

One US diplomatic report wey comot for WikiLeaks for 2008 claim say Mnangagwa don make "too much money" during 1998 wey Zimbabwe send military go Democratic Republic of Congo wey get plenty gold and diamond.

Image copyright AFP
Image example Many people believe say Mr Mnangagwa don dey plan to become president after Mugabe

Full Name: Emmerson Dambudzo Mnangagwa

Nickname: "Ngwena" (Di Crocodile)

Born: 15-09-1946


  • First Vice President of Zimbabwe
  • Minister of Defence | Government of Zimbabwe 2009 - 2013
  • Minister of Rural Housing and Social Amenities | Government of Zimbabwe 2005 - 2009
  • Minister of National Security | Government of Zimbabwe 1980 - 1988


  • Hodgson Technical College City and Guilds | Industrial Building Course - 1960
  • University of London/University of Zambia | LLB - 1974
  • University of Zambia | Post-graduate degree - 1975

Topics Wey Dem Resemble

Another thing we de for inside dis tori