Zimbabwe's Mnangagwa dey promise jobs for new democracy

Zimbabweans celebrate after President Robert Mugabe resigns for Harare on November 21, 2017 Image copyright Getty Images
Image example Zimbabwe people dey celebrate after President Robert Mugabe resign on 21 November

Zimbabwe next president Emmerson Mnangagwa don hail di country new democracy after im return to di country for Wednesday evening to replace Robert Mugabe.

Mr Mnangagwa bin promise say im go create jobs for di country where almost 90% of people wey fit work, dey house dey sleep.

"We wan grow our economy, we wan peace, we wan job, job, job," Mr Mnangagwa tell people as dem dey hail am for Harare.

Tori people for Zimbabwe dey talk say by Friday dem suppose swear in Mr Mnangawa, wey run comot go South Africa two weeks ago, as new president.

Image copyright EPA
Image example Mr Mnangagwa dey give speech for outside Zanu-PF party headquarters

Di way which former president Robert Mugabe remove im former friend na im cause di ruling party and military to join hand, carry force to end Mugabe 37 year government.

Mr Mnangagwa tell supporters wey dey di headquarters of di ruling Zanu-PF party say plans bin dey ground to kill am.

Im tell di army 'thank you' for di peaceful way wey dem use take comot Mr Mugabe, im former oga.

Image copyright AFP
Image example Happiness fever don spread for Zimbabwe since Mugabe resign

Wen di tori break for afternoon say Mr Mugabe don resign, na big jollification e cause all over Zimbabwe sotay e pass midnight.

Parliament bin dey do meeting for Wednesday to impeach Mugabe wen letter show from di president say im don ready to step down.

Na sharp-sharp di impeachment meeting stop after lawmakers from di ruling party and opposition begin celebrate.

Image copyright AFP
Image example Robert Mugabe don rule Zimbabwe for 37 years

Inside di letter, Mugabe talk say di reason why im dey resign na because im no want any wahala.

One Zanu PF talk-talk person say Mr Mnangagwa go continue di current government until dem do di fresh election for September 2018.

South Africa President Jacob Zuma and Mr Mnangagwa a.k.a ''The Crocodile'' don meet sef before Mr Mnangagwa come back to im country.

Image copyright Reuters
Image example Emmerson Mnangagwa na new leader of Zanu-PF

Thousands of party supporters wait tire to welcome Mr Mnangagwa, di first time im go show for public after im run comot.

For di speech, wey reach like twenty minutes, Mr Mnangagwa correct imself after im call Mr Mugabe "president", instead of former president.

Na big palava bin hang Zimbabwe for neck wey di country never see before after Robert Mugabe fire Mr Mnangagwa.

Image copyright AFP
Image example Rivals dey accuse President Mugabe say im wan handover power to im wife, Grace

Many sabi people believe say Mugabe wan make im wife, Grace, to take over as president.

But di Zimbabwe military no like dis plan wey go give Grace ultimate power, so dem comot from dia barracks, take over di government television station and put Mugabe for house arrest.

Meanwhile for di Zimbabwe constitution, no be Mr Mnangagwa suppose become di next president.

Na di current vice-president Phelekezela Mphoko suppose enter di office wey Mugabe don surrender.

Tori be say Mphoko and Mrs Mugabe be close padi. Nobody know whether Mphoko dey for di country or not.

But wetin dey sure be say Zanu-PF don remove am comot from di party and since im no dey inside di country, di party don choose Mr Mnangagwa to replace am, dis na according to di speaker of parliament.

Image copyright AFP
Image example Before-before Emmerson Mnangagwa na very good padi of Robert Mugabe

Some people dey wonder if Mr Mnangagwa go bring any change for di country.

Opposition leader Morgan Tsvangirai say im dey hope Zimbabwe go begin fresh journey wey go include free and fair elections.

Tsvangirai talk say dem suppose allow make Mugabe go rest before im die.

Mr Mugabe wey reach 93-years-old, na di oldest leader for world and one time he claim say na only God fit comot am from government.

Topics Wey Dem Resemble

Another thing we de for inside dis tori