Libya: 'Make all Nigeria states come dey collect dia pickin'

Nigerians as dem run from Libya
Image example Di plane land around 6:30pm Nigeria time

Di number of Nigerian migrants wey just come back from Libya don pass 400.

Na two plane land from Libya; one around 6:30PM local time Tuesday and another one around 1:47AM for Wednesday.

BBC News Pidgin tanda with di plane wey carry dem land for Tuesday evening for Lagos and na so plenty young men, women and even teenagers full di plane.

Abike Dabiri-Erewa wey be di Senior Special Assistant to Nigeria President on Foreign Relations and Diaspora tell BBC say she dey very sad, but "dis ones lucky say dem no die. Many people don die."

"When I see dis people, di first thing na say I dey sad. I dey cry. Especially when I see small pickin - 13, 14, 15-year-old-girl wey talk say e no fit count how many man don sleep with am, because im Mama send am go Europe, say make she make money," an wetin she talk.

Image example Many young people follow come back, but parents too dey inside with dem small pickin

Ms Dabiri-Erewa say make people no dey go dis kain journey because e no worth am.

"Some dey go back to dia State... make every State come carry dia pickin when dem come here. Na di thing we dey tell dem - all of dem Abia, Imo, Enugu dem plenty here, Anambra make dem dey send dia people here, so dat dem go take dem back home, teach dem skills, as others dey do."

She say states like Edo and Delta don begin help dia people wey run from Libya.

Dem no support media player for your device
"Dem sell me three times for Libya"

"We don see some wey come back since January, dem don start to dey work. Some don learn how to cook, some don learn furniture work. So na so make every state encourage dia peopel make dem dey do."

Libya don dey everybodi mouth for world, after tori comot say slave market dey dia where people dey sell African migrants troway for money.

Other people wey dey di group na mostly young people, but even couple with dem pickin dey and people wey dey come back with belle.

Image example Di registration process na di first thing wey di migrants dem dey do as dem dey enter back Nigeria

For di last 10 months, na young Nigerian migrants na im don return from Libya with help from di National Commission for Migrants, Refugees and Internally-displaced Persons.

Di Zonal Coordinator for di NCRMI, Mrs Margaret Ukegbu, talk say as at today na 4,100 don enter.

Nigeria President Muhammadu Buhari talk for Tuesday night inside Abidjan say im government go bring back and help "all Nigerians wey don hook for Libya and other parts of di world."

Buhari bin dey speak to Nigerians wey dey oversea, as e dey attend di EU-Africa Summit wey be meeting of leaders from Europe and Africa. E promise to reduce di number of Nigerians wey dey try enter Europe illegally through di Sahara Desert and di Mediterranean Sea by giving dem education, healthcare, and food to see chop for home.

Topics Wey Dem Resemble

Another thing we de for inside dis tori