Nigeria: 'Nothing dey to hope on now, everything burn' -Festac victim

Chinedu Nwogbo
Image example Chinedu Nwogbo lost 21 cars wey worth over 100 million for di fire.

Chinedu Nwogbo na shadow of imself, one week after tanker with diesel fall catch fire destroy 21 cars for im shop for Festac, Lagos, Nigeria.

Im tell BBC News Pidgin tori person Helen Oyibo say im dey shop when di whole incident happen, im use eyes see how im cars burn reach ground, and im life no be di same again.

Di matter don serious reach sotay im dey surrounded by some people. Some na im friends while some dey work with am.

"Dat day na Wednesday last week I come shop dat day around 8am, na around 11:20am na im happen. I just answer call finish, di next thing I hear na 'its rolling back! its rolling back!' I look...I see tanker dey roll back."

"I ask di boys where di keys make we remove di cars, di next thing I see na fire, when di tanker fall di diesel roll inside gutter, some buses wey dey follow di tanker wey wan run escape na im start di fire."

Image example Di tanker as e dey full with diesel.

Mr Nwogbo say things don change since di fire incident for am, as things dey terrible. Im lose over 90 million for di incident. Na 21 cars burn.

Image example Na 21 cars na im Nwagbo lose for di fire.

"Before di fire incident I still dey discuss with my colleagues say I never witness dis kain Christmas before wey we no sell market like dis, I no know say di worst still dey come. E no reach 20 minutes after we talk dis wan nai di fire happen."

"All our hope, all my hope dey di cars. I tell my wife say no mata how terrible e be we must sell something before di 25th wetin I go hope on now, nothing dey to hope now everything don burn."

No be only Mr Nwobgo lost for di fire incident.

Image example Abiodun Rotimi na furniture maker wey still lost all im business for di fire too

Abiodun Rotimi na furniture seller, im tell us say im lose all im furniture inside di fire.

"I dey come from market when I see di tanker dey roll back ontop bridge. I tell di bike man to carry me go safe place, na from dia I see everything dey burn."

"I no fit do anything, I no fit save anything, even pen. All my documents burn, people order, I lose reach N10mn. I lose everything because I no get another branch, dis na everything wey I get."

Nobodi know who get di tanker as di driver and conductor run comot, di day di fire happen and nobody don come claim responsibility

Mr Nwogbo say im don write give government to come help dem.

"I don submit appeal give Lagos state governor Akinwunmi Ambode, also to Lagos state House of Assembly. Dem know wetin happen and we dey believe God say dem go help us."

Image example Di tanker wey carry diesel roll fall from di Festac link bridge, affect di bridge too.

Di fire affect di bridge, and government don close am so dem go check am, work on am to prevent more accidents dem.

Topics Wey Dem Resemble

Another thing we de for inside dis tori