2017: Di year wey 'hot' for African presidents dem

From west to east and southern Africa, 2017 na year wey dozens of African leaders get red eye on top different wahala. See some of dem.

Yahya Jammeh

Wia dis foto come from, AFP/Getty Images

Wetin we call dis foto,

For January, former Gambia president Yahya Jammeh wey don rule di country with strong hand for 22 years resign, then run comot. Jammeh no wan resign before, even though im lose presidential election to im rival, Adama Barrow for December 2016, until ECOWAS forces surround di capital, Banjul. Human rights organisations say Jammeh government na corrupt one wey spoil di economy, arrest, torture and kill opposition people.

Wia dis foto come from, Bayo Omoboriowo/Nigeria Presidency

Wetin we call dis foto,

Di kain sickness wey hold Nigeria President Muhammadu Buhari from January to June no get part two. Mr. President just dey enter hospital for London for medical treatment on top sickness wey nobodi know. During dis time, economy hard Nigerians as Naira weak, price of crude oil reduce, things cost for market and Boko Haram continue with terror attacks for North anyhow. Some Nigerians vex, come begin dey protest say make Buhari resume or resign. Na acting president, Professor Yemi Osibanjo Nigerians hail as di person wey turn things around for di economy.

Wia dis foto come from, PATRICK KOVARIK/AFP/GETTY IMAGES

Wetin we call dis foto,

Thousands of people enter street week after week since August for different parts of Togo dey protest because of di matter of presidential term limit. President Faure Gnassingbe don dey power since 2005, after im take over from im Papa wey be Gnassingbe Eyadema. Dat one get power through coup, come rule for 38 years, before im die. Di opposition wan make Gnassigbe step down immediately, and make im no contest again for 2020, but Gnassigbe no dey shake body on top di palava.

Wia dis foto come from, AFP/GETTY IMAGES

Wetin we call dis foto,

Opposition group dem and dia supporters hold big protests for Democratic republic of Congo, say make President Joseph Kabila step down. Mr Kabila second term for government suppose expire on 20 December according to di constitution. Di election to choose new president suppose happen for November, but di president postpone am. As e be so, di country never get smooth transfer of power since independence more than 55 years ago.

Wia dis foto come from, AFP/GETTY IMAGES

Wetin we call dis foto,

Kenya vote two times dis year for new president. Di Supreme Court bin cancel di first presidential election wey dem do for August because of wetin dem call "irregularities." President Uhuru Kenyatta win di re-run, wey happen on 26 October with 98% of di vote, but na only 39% of voters come out. Opposition leader, Mr. Raila Odinga no gree digest di result; im talk say di ruling Jubilee party steal di election.

Wia dis foto come from, RODGER BOSCH/ AFP/ GETTY IMAGES

Wetin we call dis foto,

South Africa President Jacob Zuma no go miss 2017. Dis na di year wey Supreme Court say im must face court case wey reach 783 charges for corruption, fraud and money laundering wey happen for 2005. Then im former wife, Nkosazana Dlamini-Zuma, wey im hope go replace am as head of di ruling Africa National Congress lose party election for December to current deputy president, Cyril Ramaphosa. Tori people for South Africa dey say chance dey say Ramaphosa fit comot Zuma from government, before im time expire for 2018.

Wia dis foto come from, AFP/GETTY IMAGES

Wetin we call dis foto,

For November, 93-year-old Robert Mugabe resign as Zimbabwe first and only commander-in-chief since independence almost 40 years ago. Di wahala wey hook di former popular leader for throat start when im wife, Grace and im deputy president, Emmerson Manangwa, begin dey drag who suppose replace am after im retire. Mugabe strike first, come sack Mnangwa wey run comot go South Africa. But di Zimbabwe military, wey no like Grace, chook mouth into di matter and few days later, Mugabe say im no do President work again.

Wia dis foto come from, ISSOUF SANOGO/AFP/GETTY IMAGES

Wetin we call dis foto,

Since 2 December, more than 6,000 Southern Cameroonians don cross border enter Nigeria as refugees. Tension don full di Southern part of Cameroon, as thousands of people from di minority English-speaking region dey use vex demand freedom to form dia own country - dem feel say di majority French speaking government dey dominate dem. President Paul Biya don say authorities go deal with southern Cameroonian militants wey don kill-kill police and soldier dem.

Wia dis foto come from, MarCO LONGARI/AFP/GETTY IMAGES

Wetin we call dis foto,

Jose Eduardo dos Santos step down as president of Angola, after im down rule for 38 years. E be like say di new Angola president João Lourenço wan begin dey give di rich and powerful Santos family tough time, after im sack di daughter of Santos, Isabel dos Santos, wey be Africa richest woman as head of di state oil company Sonangol. Di new government don also begin investigate Sonangol, after millions of dollars waka comot during di time Isabel dey in charge.