Nigeria: Shine your eye for fake anti-malaria drugs - NAFDAC
Nigerian pharmacist Ahmed Yakasai wey don dey di profession for over 34 years don blow alarm recently for social media say fake Coartem tablet don plenty for ground.
Coartem na popular anti-malaria drug wey plenty people for di country dey take, to fight di illness.
Dis matter serious sotay di National Agency for Food and Drug Administration and Control (NAFDAC) bring out statement to draw ear, warn people say make dem shine dia eyes on top di fake Coartem tablets.
Na just for November na im di World Health Organization bring out report say 1 in 10 medical products for developing countries na either low standard or fake.
How una fit know di fake and original?
Tori from NAFDAC be say di active ingredients wey dey di sachet of di fake Coartem tablets, dem write am wrong as artmethe/umfantrne, while di manufacturer, dem write wrong as NOVRTS.
Dem want make people know say di company wey dey produce di original Coartem tablets wey NAFDAC register na NORVATIS PHARMA AG be dia name. While di active ingredients wey dey di original one na Artemether/Lumifantrine.
According to NAFDAC, if person swallow dis fake Coartem tablets, e fit lead to poison because of di dangerous things wey dey inside.
E fit also make any treatment no work for di bodi, make di bodi dey resist drugs and even death.
For Twitter, Nigerians don react to di alarm wey Mr Yakasai raise, and also drop advise on top how people fit dodge di fake Coartem.
Tolu Chris tweet say make people dey scratch di security or Tamper evident label comot, and send wetin dey dia to di short code wey dey di carton of di drugs, before dem leave di store where dem for buy am, to find out if na original.