Nigeria: You ready to do rice farm business?

Jollof rice inside plate Image copyright NDUDU BY FAFA
Image example Rice na one of di most popular food for Nigeria

Now wey Nigeria President Muhammadu Buhari for im New Year talk, announce say di country go stop rice import for 2018, many people fit dey consider to enter di business of rice farming.

Di president say "local rice, fresher and more nutritious go dey our plate from now on."

For inside one 2014 interview wey former Nigeria Minister of Agriculture Akinwunmi Adesina do with local tori people Channels TV, im say na rice farming dey bring money pass any other agriculture farming for Nigeria and with President Buhari government 2018 ban on rice import, dis one mean say rice farming for di country fit begin grow well-well.

Image example Na local rice Nigerians fit see for market by end of 2018

So if person wan start rice farm for Nigeria, where you go begin from? How you go even take start?

Where correct land dey for rice farming?

Many states for Nigeria get di kind land wey dey okay to take plant rice because e fit grow on almost any kind of land.

Even though land wey get water inside, like poto-poto, na im better pass for rice farming.

Benue, Borno, Kaduna, Kano, Niger, Taraba, Lagos, Enugu, Cross River and Ebonyi na some of di states wey rice farming dey do very well.

Which kind rice seed dey grow well?

Because different-different rice seed type dey wey person fit plant for Nigeria, person must choose based on many things like di kind of soil wey dey di land, whether water go dey, or disease wey fit catch am.

Some dey wey fit grow for dry season, others dey wey dia weed no too dey plenty. Di different-different number wey dem dey carry na to separate dem.

Di popular types for Nigeria be:

FARO 44 - Dis seed dey produce high rice harvest and im harvest time dey short pass many of di other rice seed.

Na FARO 44 popular pass for Nigeria, even di former agriculture minister say na correct rice seed.

FARO 52 - Di harvest time of dis FARO 52 dey tay pass FARO 44 but di size of di harvest dey plenty pass am.

Image example Different rice seed don dey wey fit even grow for dry season

Where you fit get dis seeds?

  • Africa Rice Centre (AfricaRice)
  • State Agricultural Development Project (ADP) from state governments
  • River Basin Development Authority
  • National Agricultural Seed Council (NASC)
  • Commercial seed companies
  • Other farmers wey dey plant rice

Where you fit get loan money?

  • Central Bank of Nigeria (CBN) Agricultural loan - N75billion dey available
  • Bank of Agriculture (BOA) - Small loans from like N100,000 dey available
  • Agriculture Co-operative Society - Like All Farmers Association of Nigeria (AFAN), Youth Empowerment in Agricultural program (YEAP), and FADAMA
  • Commercial Banks
Image copyright AFP
Image example Many West Africa countries dey import rice

Fact on rice in Nigeria

  • Nigeria import 2.3 million tonnes for 2016
  • Nigeria dey spend $5m a day on top rice shipment
  • Rice na 1.26% of di entire Nigeria budget for 2017

Topics Wey Dem Resemble

Another thing we de for inside dis tori