Benue protest organisers accuse Nigerian Army say dem shoot three people

Protesters Image copyright Other
Image example People enter street dey protest for Makurdi, capital of Benue State

People wey organise protest waka for Benue State, north central Nigeria, don accuse Nigerian Army say dem shoot, come kill two people and wound one of dem members.

On Wednesday, hundreds of Benue youth enter street dey protest di killing of twenty Benue people for Guma and Logo local government areas of di state.

Dem say na Fulani herdsmen enter di villages come dey shoot innocent people and burn dia houses and hut.

Dem block major road for di state and burn tyre for streets.

Nigeria: 'Why we attack Benue people' - Fulani herdsmen

Nigeria: Benue State wan ban anyhow waka of cow

Image copyright Irene Awunah -Ikyegh
Image example Irene Awunah -Ikyegh

Irene Awunah -Ikyegh wey be one of di organisers, say di shooting happen wen di protesters block road and as di commandant of di 72 battalion dey come back from security meeting, di people no allow am pass.

She say na im army come dey impatient, come begin dey shoot.

But di Assistant Director of Information for Nigerian Army 707 Special Force, Olabisi Ayeni, tell BBC News Pidgin say di army no get any information say dem shoot protesters.

Irene say na lie Ayeni talk. She talk say one of di people wey bullet go hit no even follow for di protest. She say dat person just dey come back from where im go chop, when di bullet hit am.

She say di person dey receive treatment for one hospital for Makurdi, di state capital.

Irene dey vex give military say dem get hand inside di kata-kata wey dey happen for di state.

But di Nigerian Army don deny dat kain claim. Di Army tell BBC Pidgin say dem dey "constitutionally responsible to protect di lives of every Nigerian," and dia ethics no go allow dem take side for di kata kata wey dey happen for Benue.

Image copyright Other
Image example Di protesters block major road for di state

Also, police for Benue State say dem dey investigate di matter say shooting happen for di protest on Wednesday.

Police talk-talk person, Moses Yamu, say dem still dey look into dat kain talk. Yamu say wetin police sabi for now be say some bad boys bin highjack di protest but dem no know wetin cause dia death.

Im also say all di security people dey meeting for Nassarawa State to see how dem go deal with di kata kata wey dey happen for di state.

Another thing we de for inside dis tori