Five things you go see inside new Trump book 'Fire and Fury'
Before Fire and Fury: Inside the Trump White House come out for midnight, people don already dey long queue dey wait for dem to start to dey sell dis book.
All di way wey America President Donald Trump bin try stop di publication of di book after dem use eye see small of wetin im contain no stop di release of di book
Instead, dem release di book before di first day dem plan am.
Di author of dis book na 64-year-old Michael Wolff; im na person wey dey write for magazine like New York Magazine and Vanity Fair, and im way na to go behind di scene to write mainly about media organisations and dia owners.
For dis im new book Oga Wolff say im get chance to know wetin dey happen inside White House, after im interview President Trump for June 2016, and Trump sef "dey aware" say im dey write di book.
But wetin dey inside di book wey make am bestseller overnight and wey make Trump administration dey vex?
Some things wey you go read inside 'Fire and Fury'
Di book claim say:
- Trump team dem shock and no believe say im go win di election
- Im wife Melania cry tears of sadness di night im win
- Trump vex well-well say superstars dem no gree show for im inauguration
- Trump imself when im win "see White house as something wey im fear and wey dey make am vex."
- Im daughter, Ivanka been get plan with di husband, Jared Kushner say she go become di "first woman president."
Wetin di White House get to talk about di book?
Trump never comot from Twitter since di book come out. Im first start by saying im no ever give Wolff permission to enter White House come do tori.
Talk-talk person for Trump wife Melania don also come out say she dey her husband back when im come out to contest, and dey happy say im win.
On Thursday, di White House also bin say dem dey ban personal device like phone from di West Wing because of security concerns.