Hawaii fake alarm: See 3 times panic turn to be lie inside West Africa

Rumour wey don cause fear don happen plenty times for west Africa Image copyright STRINGER
Image example Rumour wey don cause fear don happen plenty times for West Africa

Di panic and fear wey cause people run left, right and centre just di oda day for Hawaii, United States on top 'fake' ballistic missile attack, na something wey people inside West Africa fit relate.

Dis latest one for Hawaii state, US na text message na im di rumour monger take catch people but before government go discover say na lie, e don spread like wild fire:

Dis kain thing don happen before for parts of West Africa, although e dey different.

See some of di false alarm wey cause serious panic wey even kill people inside Nigeria, Ghana and Cameroon.

Nigeria Ebola salt water rumour

Image copyright ABC
Image example Plenty people all over Nigeria fall for dis salt water trap

At least two people die because of this fake text message dat time.

For September 2014 when Ebola virus begin spread for west Africa, na im one kain text message enter people phone for Nigeria say make dem drink plenty of salt water to avoid di virus.

Tori be say people fall wella for dis joke wey start on top social media so tey e reach 20 people wey dem carry go hospital because dem follow drink di salt water.

Di government for Nigeria quick-quick run come outside say na lie oh, but before dat one, some wey fall for di rumour don lose dia life.

Jakiri panic after Nyos Lake Gas Explosion

Image copyright Wikimidea Commons
Image example Nyos Lake gas explosion over 1700 people to death for 1986 inside Cameroon

After di August 1986 gas explosion wey kill pass 1,700 people for Nyos Lake area for di north west region of Cameroon, na so people wake up one morning years after to begin panic say another gas explosion wan happen for Jakiri area, for di same region.

Nobodi know where di panic dey come from, but everywhere scatter. Some begin give dia pickin oil to drink, odas begin run on top fear say gas wan explode.

Finally e happen say nothing like dat be true.

Ghana Earthquake Rumour

Image example Fake text message dey cause plenty wahala all over di world

For January 2010 na so text message begin fly overnight dey quote US space agency Nasa and BBC say na dem say "cosmic rays" go land for Earth.

By early morning di next day, people don conclude say na earthquake wan happen for Ghana (di rumour begin spread just one week after one bad earthquake happen for Haiti) so people begin panic, pack dia load comot from dia dormot.

Image example Di 2010 panic no cause any death for Ghana

Na one government minister run go local radio stations to calm people across di country, come tell dem say na lie.

Topics Wey Dem Resemble

Another thing we de for inside dis tori