Kaduna Kidnap: Gunmen carry Canadian, American near Kagarko village
Breaking tori be say kidnappers don abduct one Canadian and one American, come kill two police officers for Kaduna.
Di state police command just confirm di tori fo dis kidnap to di BBC. Tori be say more kidnappings dem don dey happen for Kaduna.
BBC tori person Chris Eworkor say police say di kidnapping happen around Kagarko village, along di Abuja/Kaduna highway.
Dem say gunmen comot from where dem hide, carry di men wey dey travel for two vehicles, even though di foreigners dia police escorts follow di police do shoot-shoot.
Na so di policemen die for di gun battle.
Different parts of di Abuja-Kaduna road don turn to market for kidnappers. Two German archaeologists na im dem kidnap for di area for February last year, but dem free dem later.
For Nigeria kidnappings of both Nigerians and foreigners don dey plenty. Last October na im four Britons enter kidnap for di Niger Delta region.
Dem kill one of dem, while dem release three, after negotiations.
We go dey update una as di tori dey happen.