Dino Melaye vs Federal Government court case na March 1

Senator Dino Melaye Image copyright Dino Melaye/Instagram
Image example Senator Dino Melaye share dis picture for im Instagram as federal government nack court case for im head

Federal Government of Nigeria go carry Senator Dino Melaye go Abuja high court for 1 March 2018.

Federal Government dey claim Senator Melaye, wey dey represent Kogi west senatorial district for National Assembly blow lie to police say di chief of staff to di Kogi State governor, Edward Onoja David, try kill am for Ayetoro-Gbede inside di state last year.

Na di office of di Attorney General of di Federation (AGF) carry di case, wey get di number CR/106/18, go Abuja high court for 31 January 2018.

Di two things dem charge Melaye be say:

  • Di Kogi west senator lie on top Edward Onoja David head say, Onoja try kill am for 17 April 2017.
  • Di Kogi west senator dey spread fake news about Edward Onoja David, wey fit destroy Onoja name.

According to dis charges wey Magaji Labaran, wey be government lawyer sign, police discover say na lie Melaye lie wen dem investigate Edward Onoja David hand inside di kill-kill matter.

But government lawyers still never give Melaye im own copy of di charges because when dem show for im National Assembly office last week, dia plan to hand over di charges enter k-leg.

Tori be say dem go give am di charges before di case start for March.

Na Justice Olasumbo Goodluck for FCT High Court, Maitama go handle di case.

According to di News Agency of Nigeria, di second charge claim say Melaye bin tell Mohammed Abudu Abubakar, wey be son of di late former governor of Kogi State Abubakar Audu, say im wan destroy Onoja name, na why im drag im name enter dis fake crime.

Topics Wey Dem Resemble

Another thing we de for inside dis tori