Dapchi School Girls: 'Yobe Governor just tell us say dem never see any of our daughters' - Papa

Some girls from Dapchi Secondary School Image copyright ALKASIM BALA
Image example E never still dey clear how many girls dey miss for di school.

Papa of one of di school pickin dem for Government Girls Science Technical College, Dapchi, Yobe State northeast Nigeria wey dey miss since Monday just tell BBC say di state governor, Ibrahim Gaidam just tell dem say dem never see any of dia daughters but say di military dey chase di people wey kolobi di school girls.

Kundiri Alhaji Bukar say five of di mama and papa dem faint instanta as dem hear di tori.

Alhaji Bukar talk say "im (di governor) tell us wetin come make us sad pass when we hear say dem don kolobi our pikin dem. Im (Governor Gaidam) say dem bin send soldiers to look for di girls but di military commander tell am say dem no fit find where di girl pickin dem dey with Boko Haram militants.

Im (di Yobe state Governor) say no one really dey sure whether Boko Haram na im kolobi di school girl pickin dem. But we for our side, we believe say Boko Haram na im kolobi di pickin dem. I swear to God, Boko Haram na im carry dem!"

Another person wey dey di meeting say dem boo di governor come stone am, afta im make di announcement.

Dis one dey happen after e never pass better 24 awas when Army bin claim say dem don see some of di Dapchi school girl pickin dem.

Information Minister Lai Mohammed bin tell tori people on Wednesday say na Boko Haram go kolobi di girls on Monday for dia school and say di Defence Minister go lead two oda ministers including him go di school on Thursday on behalf of federal government to really find out wetin dey happen.

Now people don dey confuse on top who dey talk true for dis mata.

For April 14 2014 na im Boko Haram bin kolobi school pickin dem wey pass 200 for Chibok, Borno State inside di same northeast Nigeria. Di government don dey try dey collect back some of di girls wey loss dat time and President Muhammadu Buhari wey enter government for May 2015 don promise to finish Boko Haram and return all di Chibok school pickin dem.

Image example Nigeria President Muhammadu Buhari

Security na one of di main-di main things wey dey on top President Buhari government agenda but dis kain thing wey dey happen fit spoil di mata for im government.

Topics Wey Dem Resemble