Ugandans wan 'domestic abuse' lawmaker to resign

Mr. Onesimus Twinamasiko Image copyright NTV Kenya
Image example Kenya lawmaker Mr. Onesimus Twinamasiko

Ugandans wan di lawmaker, wey talk say e good for husbands to beat dia wife dem, to resign.

Mr. Onesimus Twinamasiko, wey dey represent Bugangaizi East County MP for Uganda, cause kata-kata after im talk say husbands suppose dey beat dia wife dem to teach dem lesson wey go give dem sense.

"If you be man, you suppose discipline your wife…touch her small, fight her, and beat her so she go get sense,'' Twinamasiko tell local station NTV.

Di speaker of Uganda parliament Rebecca Alitwala Kadaga don tell di Rules, Privileges and Discipline Committee to investigate di lawmaker on top domestic violence.

Image copyright SIMON MAINA
Image example Twinamasiko talk say im don slap im wife before

But Twinamasiko don do u-turn for BBC interview yesterday.

"No be beating wey go cause injury or death l dey talk - but na slap - dis one go make me feel fine! Because e go call me to order. We go siddon and try and find solution.

"One time l slap my wife and e dey fine with am because later we nack head together, find solution to our wahala.

Twinamasiko don enter hot soup for social media with dis talk im talk, sotay one top women rights group for Uganda talk say im suppose enter brain hospital.

"Mr Twinamasiko suppose beg all women wey don experience violence," Diana Kagere for di Center for Domestic Violence Prevention (CEDOVIP) tell di BBC.

Image copyright Getty Images
Image example Sexual violence na one mata wey dey give Kenyan women headache

Social media no waste time as dem react to di short video wey don spread for internet.

While some people dey support wetin Mr Twinamasiko talk, others dey use di hashtag #OnesmusTwinamasikoMustResign:

More than one in every five women between di age of 15-49 dey experience domestic or sexual violence for Uganda, according one government report for 2017.

Another thing we de for inside dis tori