Gold mine wey kill six pipo na because of bad engineering work - Ghana minister

Mining for Ghana

Wia dis foto come from, CRISTINA ALDEHUELA

Wetin we call dis foto,

One man wey dey find gold for illegal mining site for Kibi

Minister for Lands and Natural Resources for Ghana, Peter Amewu say na bad engineering cause di accident wey kill six pipo for one gold mine on Saturday.

Im tell tori pipo dis one, as im go wia e appen. Oga Amewu describe am as 'tragedy', but point say if dem bin do some kain adjustments, e for help di tunnel make e no fall.

"Na complete structural failure. You realise say during di time wey dem dey do casting, di concrete fall. Investigations still dey go on, but e dey clear say wetin suppose support di slabs maybe dem no put am well, wey make am to fall", im talk.

Di Minerals Commission don take over di site as dem dey do investigations and na di Principal Inspector of Mines for di Ashanti Region dey lead with police.

Na six miners bin die and two injure wen di roof of one tunnel fall for gold mining site for Ghana southern region.

Na one US company - Newmont dey operate di mine for di Brong Ahafo region, wey dey 430 kilometres from di capital Accra and dem confam wetin appen.

Di company talk-talk pesin Agbeko Azumah say two pipo wey wound collect treatment for clinic and say dem discharge dem on Saturday wey di accident appen.

Wia dis foto come from, CRISTINA ALDEHUELA

Wetin we call dis foto,

Wuruwuru mining like dis one for Kibi dey appen for Ghana

Di company say dem don suspend work for di site and carri workers comot for di mine to allow for investigation.

Newmont na one of di largest producers of gold for di world and dem get two mines for Ghana wey dem enta for 2006.

For July last year, at least 22 pipo die afta one illegal goldmine collapse for western Ghana.