Who dey kill Nigerian youths for London?

Israel Ogunsola Image copyright Met Police
Image example Israel Ogunsola na one of di Nigerians wey dem stab for London

For di first four months of 2018 alone, more than 50 black pipo, most of dem young pipo, don die weda through knife or gun, for inside di city of London.

On 25 March, one 26-year-old Abraham Badru, pikin of Dolapu Badru wey bi Nigerian lawmaker, die for im mama hand for front of dia house for Hackney, UK tori pipo bin report.

Na from gunshot im die. Police never catch di attacker.

E no even reach two weeks afta dis one, on 4 April, wey anoda Nigeria young man Israel Ogunsola 18, die from knife wound afta dem chook am for bodi.

Police don arrest one 17-year-old boy ontop murder charge and dem dey find anoda suspect.

Like so, like so, tori plenty of many Nigerian young pipo wey don die for London - at least nine cases wey dem report.

And more than 18 cases still dey wey police no even get official report for.

Image copyright PA
Image example Dem find 18-year-old Ogunsola for ground with wound for Link Street, Met Police bin announce

Nigerians wey don die for 2018 for London

Dis na according to wetin di Nigerian gofment release give tori pipo.

  • Oluwadamilola Odeyingbo, 18
  • Taofeek Lamidi, 20
  • Harry Uzoka, 25
  • Rotimi Oshinbajo, 26
  • Fola Odubiyi, 18
  • Niyi Shode, 24
  • Kelvin Odunuyi, 19
  • Abraham Badru, 26
  • Israel Ogunsola, 18

Wetin Nigeria gofment dey do?

Nigeria gofment dey warn dia pipo wey dey for UK, say make dem dey careful.

Senior Special Assistant to di president on Foreign Affairs and Diaspora Abike Dabiri-Erewa nack dis warning for statement.

She say di kill-kill of blacks, especially dose wey come from Nigeria to London, don increase, and say e dey worrisome and disturbing.

Dabiri-Erewa bin last week write I-no-go-gree letter to di British High Commissioner for Nigeria, say make dem investigate di mata and deliva justice.

Wetin di UK gofment get to say?

E no dey clear weda di high number of pipo wey don die na because plenty Nigerians already dey live for di area or because dem dey target Nigerians.

But wetin dey clear na say di UK gofment know say dis kain violence among young pipo no dey normal and dem don dey find wetin fit be di reason for attacks wey don go up dis year.

UK Home Secretary Amber Rudd say "strong link" dey between illegal drugs trade and di violence.

But according to one Home Office document wey leak comot, e say di reason why violent crime fit don increase for UK fit be di police officers wey don reduce.

Dabiri-Erewa bin last week write I-no-go-gree letter to di British High Commissioner for Nigeria, say make dem investigate di mata and deliva justice.

Topics Wey Dem Resemble

Another thing we de for inside dis tori