Why Nigeria senators dey vex for President Buhari

National Assembly Image copyright SHIRAZ CHAKERA

Di Nigeria senate don order dia judiciary committee to check weda President Muhammadu Buhari break di constitution.

Di senators say di president no collect approval from lawmakers before e spend public fund, and dat na somtin wey fit make dem impeach am.

Mr Buhari bin write letter to di senate say make dem add $496mn to di 2018 Appropriation Bill to buy Supper Tucano aircraft from United States.

E say di 36 state governors and di National Economic Council don approve am.

But House of Representatives members bin vex on top di mata wen dem receive di same letter from presido.

Di reps say di letter na "wetin im tink later", as im done already spend di money.

Today, senators follow vex dia own. Afta plenti tok by different pipo, di senate come tell di judiciary committee to check weda wetin Mr Buhari do dey against di constitution.

Edo senator Senator Mathew Okhrigede raise concern say e no good say di president spend money from Excess Crude oil Account (ECA) and e no even tell lawmakers.

Image copyright Getty Images
Image example President Buhari bin send letter to National Assembly say make dem approve moni wey lawmakers dey accuse am say e don already spend

But oda senators like Shehu Sani say e be like say na di plenti killing wey dey happen for di kontri make Mr Buhari rush go buy di aircraft but dat one no be excuse to disobey constitution.

Mr Sani tok say e no tink say dat one na reason to impeach di president.

Anoda senator, Abu Ibrahim, beg im colleagues say make dem no turn di mata to political somtin.

Topics Wey Dem Resemble

Another thing we de for inside dis tori