Police don arrest principal wey tie and flog students dem for cross for Ogun State

Pikin wey dem tie for cross as punishment - Ogun State Image copyright PUNCH NEWSPAPER
Image example Dem begin flog di two young school pikin with koboko for roadside as punishment

Nigeria Police don arrest one school principal and two odas for Ogun state, south west Nigeria unto suspected case of wicked punishment dem cari nack students dem.

Tori be say, dem tie two young students - one boy and one girl - for cross, like Jesus Christ, come begin beat dem sake of say dem late enta school.

Abimbola Oyeyemi, wey be Ogun State Police talk-talk pesin, don talk say dis kain punishment na bad tin wey no suppose dey happen for di state.

Oyeyemi say "Wetin dem do don pass to correct pesin behaviour, na wicked action, and e no dey acceptable and we no go allow am."

Oyeyemi confam say dem arrest di principal, one teacher, and owner of di school.

One photo of one of di students wey dem tie don already comot for Twitter and pipo dey vex on top di mata.

Police no sure of di religion di students dem dey follow and Mr. Oyeyemi talk say one of di female students dem wear hijab.

Tori be say one policeman wey see as dem dey flog di students wit horsewhip wan stop di punishment but di owner of Metorite Standard School, wey be private school, attack am.

Na dis policeman call im colleagues make dem chook mouth inside di mata and na for dia katakata burst for di school owner wey dem pick up.

Topics Wey Dem Resemble

Another thing we de for inside dis tori