Democracy Day June 12: 'I stop to expect Nigeria to do di right tin for my papa until now'

  • Daniel Semeniworima
  • BBC Pidgin, Lagos
Hasfat Abiola-Costello

Wia dis foto come from, Hasfat Abiola-Costello

Wetin we call dis foto,

Hasfat Abiola-Costello na Ogbonge rights activist and presido of Women in Africa Initiative

Afta 25 years waka pass wen military goment cancel June 12, 1993 election results, Nigeria Presido Muhammadu Buhari don declare dis date as di main Democracy Day of di kontri and replace di May 29 date dem bin don dey use mark am for di past 19 years.

Presido Buhari tweet di executive order on Wednesday where im also give di kontri highest title of Grand Commander of the Order of the Federal Republic (GCFR) for only presidents to late MKO Abiola, wey many pipo believe say win di June 12, 1993 presidential election results former military president Ibrahim Babangida bin cancel.

'I stop to dey expect my kontri to do di right tin for my papa and instead begin to understand why Nigeria dey struggle to find leaders wey truly love dia kontri until today.' Hasfat Abiola-Costello wey be Abiola pikin tell BBC Pidgin.

Wia dis foto come from, Paul Morigi

Wetin we call dis foto,

Hasfat Abiola-Costello na MKO Abiola pikin

'May 29 handover date dem pick am from nowhere make am Nigeria Democracy Day, e no get meaning'. She tok.

Abiola-Costello wey be Presido of Women in Africa Initiative tok say 'afta 25 years justice land for my parents sacrifice.' She say no get words wey fit capture di kind of joy wey dey inside my belle.'

She say 'when Presido Muhammadu Buhari gave di executive order to give MKO title of GCFR wey be title for only presidents and to give Gani Fawehinmi, di rugged fighter for justice, and my papa running mate, Babagana Kingibe, title of GCON wey be di second highest title for di land, all inside one day, e show my heart wey don scata on top dis mata say integrity, fairness, honour still dey alive and well inside kontri wey my papa and mama sacrifice dia lives for.'

Chief MKO Abiola na di pesin most pipo believe win di June 12, 1993 presidential election wey goment of former military presido Ibrahim Badamosi Babangida aka IBB cancel.

Presido Buhari say im shift di date from 29 May to honour di politician Moshood Abiola, wey die 20 years ago.

Wetin again go happen on June 12

Meanwhile BBC Pidgin understand say Lagos State goment go cut tape open one giant image of MKO Abiola on 12th June 2018 and dem go do event on di 11th to mark di Epetedo declaration.

Ogun State goment go also hold a remembrance event. Civil Society organizations, labour unions and democracy groups dey also plan events across south west Nigeria on June 12. MKO Abiola Family dey also plan to do sumtin dat day for dia family house too.

All dis one go dey happen join wit di federal goment don plan on dat day.