Democracy Day June 12: Nigeria opposition PDP say Buhari na 'hypocrite'
Nigeria decide to recognize June 12 1993 election day wey military goment bin cancel, as di only Democracy Day di kontri recognize afta 25 years waka pass, according to announcement President Muhammadu Buhari make on Wednesday.
But Nigeria's opposition People's Democratic Party (PDP) say di President Buhari decision to change di date of Democracy Day public holiday to 12 June na "sign say im be hypocrite and e wan use by all means play politics" ahead of 2019 elections.
But presido Buhari say im shift di date from 29 May to honour di politician Moshood Abiola, wey die 20 years ago.
Chief MKO Abiola na di pesin most pipo believe win di June 12, 1993 presidential election wey goment of former military presido Ibrahim Badamosi Babangida aka IBB cancel.
Wetin again go happen on June 12
Meanwhile BBC Pidgin understand say Lagos State goment go cut tape open one giant image of MKO Abiola on 12th June 2018 and dem go do event on di 11th to mark di Epetedo declaration.
Ogun State goment go also hold a remembrance event. Civil Society organizations, labour unions and democracy groups dey also plan events across south west Nigeria on June 12. MKO Abiola Family dey also plan to do sumtin dat day for dia family house too.
All dis one go dey happen join wit di federal goment don plan on dat day.