Rivers LG elections: 15,000 policemen dey ground to provide security

Election officials for Rivers State LGA elections
Image example Voting materials no reach local goment on time

Local goment election wey go elect local goment chairmen and councillors for local goment legislative assembly dey hold for all di 23 Local goment areas for Rivers State, south south Nigeria.

Na early mor mor 6am na im distribution of materials from di RSIEC office for some of di local goment to di polling units and wards start, even though rain wey fall dis morning worry dem small. Dis na so dem go set up for di polling unit for di election wey suppose to start by 8am.

Image example Some areas no too come to vote like two community for Ogba Egbema Ndoni LGA

Di election no start on time for many areas as di materials reach di local goment late. For some places like Asari Tori, Akuku Tori and Degema wey BBC Pidgin visit, rain wey fall for morning naim delay dem so dem start accreditation and voting around 11 o' clock.

As part of di preparations, commissioner of police for Rivers State Zaki Ahmed say over 15,000 policemen na im dem don bring to di state to make sure say security dey gidigba for di elections. Already di no movement order wey police give from on 7am to 4pm don start.

67 out of 68 political party dey participate for di elections. Dis na because di All Progressives Congress APC for di State say dem no go follow for di elections.

Image example APC no dey follow do dis local goment elections

APC chairman for Rivers state Ojukaye Flag Amachree say dem stand wit di election wey bin hold for May 2015 wey dia party win well well and since di mata on di way dem comot all di former local goment chairmen dem still dey for Supreme Court and court of appeal, any oda election dey illegal and so dem no go follow do di election.

BBC News Pidgin go bring una updates as di election dey go.

Topics Wey Dem Resemble

Another thing we de for inside dis tori