Bukola Saraki: How 38 House of Reps members, 15 Senators dump APC party

Image example Dis na some of di honorables on Tuesday afternoon inside di House of Representatives

38 members of House of Representatives inside Nigeria National Assembly don park dia kaya waka comot from di ruling All Progressive Congress -APC party .

Tori be say 34 comot APC join PDP while four members form APC for Osun state waka join ADP party on Tuesday afternoon.

Speaker of di House, Yakubu Dogara, na im read di letter for di green chamber of di NASS. Image copyright Nigeria House of Representatives
Image example Speaker of di House, Yakubu Dogara, na im read di letter for di green chamber of di NASS.

Dis dey follow di decamp of 15 senators, wey include Kogi senator Dino Melaye and former Kano state govnor Rabiu Kwankwaso wey first happun on Tuesday morning.

Members of di APC use vex leave di chamber afta di announcement to give tok dia mind to tori pipo.

Dem say dis tin wey di 38 Reps don do no follow law, and na dem still dey in charge of di house unto say na dia members plenti pass for di 360 lower chamber.

House of Reps get 360 members Image copyright Nigeria House of Representatives
Image example House of Reps get 360 members

E dey sweet PDP for belle

PDP don tell BBC say dem go open dia door, welcomes di tear rubber members, unto say na jolli tin for Nigeria democracy.

Dem say e go help dem work wit dia fellow colleagues to save Nigeria from di harsh way of di current presido [Buhari], and give pipo for Nigeria correct democracy.

APC tell BBC say dis tori no sweet for dia mouth

Meanwhile APC tell BBC say of course dis tori no sweet for dia mouth and di ogas for di party don dey work to stop wetin dey happun but as tins be, everybodi fit see say e no dey work.

Dem still say dem go see di hand and strategize before di next general elections.

Rabiu Kwankwaso, Dino Melaye, 13 oda APC Senators don cross enta PDP

Nigeria Senate Image copyright @NGRSenate

Fifteen Senators from di ruling All Progressives Congress (APC) for Nigeria, don cross enta di main opposition People's Democratic Party.

President of di Senate, Bukola Saraki, read letter from di 15 members wey say dem don defect from di APC go di PDP.

Di lawmakers na:

  • Rabi'u Kwankwaso (Kano-Central)
  • Dino Melaye (Kogi-West)
  • Adesoji Akanbi (Oyo-South)
  • Monsurat Sunmonu (Oyo-Central)
  • Rafiu Ibrahim (Kwara-South)
  • Suleiman Hunkuyi (Kaduna-North)
  • Lanre Tejuoso (Ogun-Central).
  • Usman Nafada (Gombe)
  • Ibrahim Dambaba (Sokoto)
  • Mohammed Shittu (Jigawa)
  • Isa Misau (Bauchi)
  • Suleiman Nazif (Bauchi)
  • Shaaba Lafiagi (Kwara)
  • Barnabas Gemade (Benue)

Tuesday start with plenti drama for Nigeria capital Abuja, wia di Senate President pipo claim say security agencies block road for am as im wan leave house.

Dem also claim say security pipo block road for Deputy Senate President Ike Ekweremadu.

Image copyright AFP
Image example National Assembly ogas wit Presido Buhari wen sun dey shine before before

Buhari vex di ringleaders of im 2015 election win

Di different kain movie wey happpun on Tuesday inside di National Assembly no surprise pipo .

No be today, politicians wey join hand deliver sweet victory for President Buhari for 2015 don dey drop warning say dem no hapi unto di way im dey run di kontri like military commander instead of politician.

Segun Awosanya wey be sabi pesin for public mata for Nigeria and chief organiser of di #EndSars campaign tell BBC Pidgin say, make presido Buhari go prepare well well unto say, wetin dey happun na sign of big tins wey dey come and fit cause serious wahala for'am.

Image copyright Segun Awosanya/Facebook
Image example Na Segun Awosanya wey start di #EndSARS protest for social media

Awosanya tok say, ''Presido Buhari no help im own mata wit di way im no dey send pipo wey dey suffer from national and security mata.''

Im still say, ''Presido Buhari change into di kain pesin im dey use mouth wire before di election, and Nigerians no dey forgive dat kain tin.''

YOU DON SEE DIS BBC SPECIAL VIDEO?

Dem no support media player for your device
Di film wey show as Nigeria football coach Salisu Yusuf dey collect cash

Topics Wey Dem Resemble

Another thing we de for inside dis tori