Bukola Saraki‏ port to PDP 'go burst katakata for Senate wen dem resume'

Saraki na di number three oga for Nigeria goment.

Wia dis foto come from, Bukola Saraki/Facebook

Bukola Saraki, Nigeria Senate president on Tuesday announce say im don comot di kontri ruling party All Progressives Concgress - APC go back to di main opposition Peoples Democratic Party - PDP.

For letter wey Saraki sign take explain why im park im load waka comot APC, di Senate Presido explain say dem (APC party) no treat him and im supporters well na im make im port.

'Saraki true-true don port comot APC', na wetin Yusuf Olaniyon, di Senate President tok tok pesin confam to BBC Pidgin.

As di Senate Presido port now na APC party still dey lead wit 54 senators while opposition PDP get 53 senators and two seats for Bauchi and Katsina still dey vacant.

Wetin go happun wen Senate re-open

Bukola Saraki fit loss im post as Senate President wen di senate re-open sitting for September, according to Sogbeye Eli wey be pesin wey sabi di law and know wetin dey shelle for APC caucus.

Eli telll BBC Pidgin on Tuesday evening say 'in fact wen dem resume, katakata go burst on to say APC don plan finish to remove am dat day'.

'I see big fight wey go happun on dat 25 September wen dem enta senate, because APC senators no go wan carri eye see am sidon on top chair as Senate President, now wey im no be dia member again'.

'Dem go apply supreme court judgement on top 'PDP against Adegunde' join section 68 of Nigeria constituion take pursue Saraki comot office' Sogbeye Eli tok

Tori be say all politicians wey dey loyal to Saraki too don waka comot from di party.

Di Senate president make di announcement for twitter.

As dis one dey happun, inside Saraki home for Kwara State north central Nigeria, di govnor Abdulfatai Ahmed on Tuesday evening announce say im don comot from APC go Nigeria main opposition Peoples Democratic Party - PDP.

APC National tok-tok pesin Bolaji Abdulahi also waka comot from di party.

Wetin go happun next for Nigeria National Assembly as Saraki di number three oga for Nigeria goment port go opposition party naim pipo dey look.

However as sharp guy concern Saraki fit run tins wit dis number dey drag chair wit APC goment.

Wia dis foto come from, @bukolasaraki

Belle dey sweet Nigeria main opposition PDP

Nigeria main opposition party don hail dey decision of Senate President, Bukola Saraki as im decamp from APC.

PDP tok-tok person, Kola Ologbondiyan say dey party door dey open to welcome am as di party ready to work with am and odas wey wan comot for APC to bring beta goment to Nigerians for 2019.

E say di party don strengthen im internal democracy to ensure say di umbrella accept everybody so dat dem go deliver dividends of democracy to ordinary Nigerians.

"PDP be dey most structured party and e go back goment wey go deliver pipo from hunger wey dem di face" Ologbondiyan tok.

Nigeria goment reaction

Information Minister Lai Mohammed tell BBC say e no dey surprise sake of say from day one Saraki no bin dey part of Buhari goment.