Aminu Tambuwal: Sokoto State Govnor don port from Nigeria ruling APC to PDP

Aminu Tambuwal

Wia dis foto come from, PIUS UTOMI EKPEI

Wetin we call dis foto,

Aminu Tambuwal na former speaker of Nigeria House of Reps

Di govnor for Sokoto State for north west Nigeria, Aminu Tambuwal na di latest to comot di ruling All Progressive Congress (APC) to join di opposition Peoples' Democratic Party (PDP).

PDP confam am for dia twitter handle say oga Tambuwal don return back house.

Wednesday bin no start well for APC, as di National Publicity Secretary of di party Bolaji Abdullahi announce for Twitter say e dey resign from im position and dey comot di party.

For statement wey im give tori pipo, oga Abdullahi tok say di reason why e comot office na say dem no call am wen dem unlawfully comot who e call "validly elected official" from im state wey be Kwara. E say dis act bin dey disrespectful.

Dis dey come one day afta Senate President Bukola Saraki comot APC.

Why Aminu Tambuwal dey port?

Wia dis foto come from, Twitter/@AWTambuwal

Wetin we call dis foto,

For 2015, Tambuwal port enta APC say di future of Nigeria dey di party

Di govnor for statement to tori pipo give some of di reasons wey e comot di party.

E tok say good governance and di economic well being of Nigerians na im make am do wetin e do.

E follow call out APC say e pass nine million ppo wey don lose dia jobs for di past three years even as e follow add say "I no fit look di pipo wey vote me to be dia govnor show dem any meaningful Federal project wey di APC goment don start for di state."

Govnor Tambuwal also say APC neva tok on top di electoral promises wey dem bin promise Nigerians wey include how dem go restructure di kontri. Im say dem try but e no work.

As for why e dey go back PDP, im tok say, "I dey enta PDP wit clear conscience because di party don learn bitter lesson dem and don look mistake wey dem go dodge for front. Dem don change dem style to become party wey I dey pledge my loyalty."